Нэгэн үе намжаад байсан интернэт браузерийн дайн дахин дэгдэх нь ээ. Учир нь программ хангамжийн салбарт дэлхийд тэргүүлэгч Microsoft корпораци вэб браузерийнхаа хамгийн сүүлийн үеийн шинэ хувилбар болох Internet Explorer 9 (IE9) интернэт хөтөч программыг албан ёсоор гаргалаа. Гол зорилго нь өдрөөс өдөрт өрсөлдөөн нь хурцдаж буй браузерийн зах зээлд алдсан байр сууриа эргүүлэн олж авах явдал гэнэ.
2003 онд тус зах зээлийн 97 хувийг Microsoft дангаараа эзэмшиж, үнэхээр салбартаа тэргүүлэгч гэдгээ баталж байсан бол өнөөдөр ердөө 60 хувийг эзэмшиж байна.
Гэхдээ Internet Explorer 9 браузерт олон өрсөлдөгчид бий. Браузерийн дайны гол баатрууд болох Mozilla компанийн Firefox, Google-ийн Chrome нарын хэрэглээ өдрөөс өдөрт өсөн нэмэгдэж буй.
Google компаниас гаргасан Chrome браузер 2008 оны арванхоёрдугаар сард зах зээлд мэндэлсэн ч асар богино хугацаанд амжилт олж, өдгөө нийт зах зээлийн 7,5 хувийг дангаараа эзэмших болжээ. Харин Mozilla-гийн тухайд саяхан Firefox 4 браузерийн туршилтын хувилбарыг гаргасан бөгөөд дэлхийн зах зээлийн бараг дөрөвний нэг хувийг дангаараа эзэлж байна. Түүнчлэн зарим улс орны тухайд гол хэрэглээ нь Mozilla Firefox болоод байгаа юм.

С.Цэлмэг