АНУ-ын ерөнхийлөгч Дональд Трамп өнгөрч буй долоо хоногт Өмнөд Солонгос улсыг Аляскаас байгалийн хий экспортлох төсөлд 54 тэрбум ам.долларын хөрөнгө оруулалт хийх болсон гэж зарласан. Энэхүү 54 тэрбум нь АНУ-ын эрчим хүчний салбарт оруулахаар тохирсон 200 тэрбум ам.долларын хөрөнгө оруулалтын нэг хэсэг гэж тэр тайлбарлажээ.

Гэвч Өмнөд Солонгос 54 тэрбум гэсэн хөрөнгө оруулалтын дүнг няцаагаад байна. Тодруулбал, тус улс Аляскийн төсөлд хөрөнгө оруулах талаар ямар нэгэн эцсийн, баталгаатай амлалт өгөөгүй бололтой. БНСУ-ын Худалдаа, аж үйлдвэр, эрчим хүчний сайд Ким Жун Гван аравдугаар сарын 1-нд "Тодорхой тоо дурдах эсвэл баталгаатай мэт хэллэг ашиглах нь бидний тохиролцсон зүйлээс хэтэрсэн хэрэг" гэж мэдэгджээ.

Өмнөх өдөр нь АНУ-ын Худалдааны яам "Өмнөд Солонгос болон АНУ Аляскийн төсөл дээр арилжааны хувьд боломжтой нөхцөлд хамтран ажиллаж эхлэхээр тохиролцсон" гэж мэдэгдсэн юм.

Талуудын зөрүүтэй мэдэгдлийн талаар Цагаан ордноос лавлахад хэвлэлийн төлөөлөгч Тейлор Рожерс "Лхагва гаригт хийсэн хамтарсан мэдэгдэл нь Аляска муж, АНУ болон БНСУ-ын хувьд түүхэн ач холбогдолтой үйл явдал болсон" гэж хариулсан ч БНСУ-ын няцаалтад тайлбар өгөөгүй байна.

45-55 тэрбум ам.долларын өртөгтэй гэж тооцоолж буй байгалийн хий дамжуулах хоолойн төсөл нь 10 гаруй жилийн турш хөгжүүлэлтийн шатанд явж байгаа юм. Өнгөрсөн хугацаанд санхүүжилт болон худалдан авах гэрээ дутмаг байснаас уг төслийн ажил удаашралтай байжээ.