Ургамал, ургамлын гаралтай түүхий эд, бүтээгдэхүүнийг БНХАУ-д экспортлогчдод зориулсан сургалт боллоо. Монгол Улс, Бүгд Найрамдах Хятад Ард Улсын худалдаа, эдийн засаг, хөдөө аж ахуйн салбарын хамтын ажиллагааг өргөжүүлэх, ургамал, ургамлын гаралтай түүхий эд, бүтээгдэхүүний экспортлох нэр төрлийг нэмэгдүүлэх, экспортлогч аж ахуйн нэгжүүдийн ургамлын эрүүл ахуй, хорио цээрийн мэдлэг, чадавхыг дээшлүүлэх зорилготой энэхүү сургалтыг Засгийн газрын хэрэгжүүлэгч агентлаг Ургамал хамгааллын газар БНХАУ-ын Гаалийн ерөнхий газартай хамтран зохион байгуулжээ.

Танхим болон цахимаар нийт 150 оролцогч хамрагдсан уг сургалтаар экспортлогч аж ахуйн нэгжүүд импортлогч орны ургамлын хорио цээр, эрүүл ахуйн шаардлагыг тариалалт, үйлдвэрлэлийн эхэн үеэс судалж, бүтээгдэхүүн үйлдвэрлэлийн бүх шатанд холбогдох стандарт, шаардлагыг мөрдөх нь экспортын үйл ажиллагаанд чухал ач холбогдолтой болохыг онцлон мэдээлэл, зөвлөмж өгсөн байна.

Түүнчлэн Монгол Улсаас ургамал, ургамлын гаралтай түүхий эд, бүтээгдэхүүн экспортлоход шаардлагатай баримт бичгийг бүрдүүлэх, холбогдох цахим системийг ашиглах талаар сургалтыг Хүнс, хөдөө аж ахуй, хөнгөн үйлдвэрийн яам, Байгаль орчин, уур амьсгалын өөрчлөлтийн яам, Гаалийн ерөнхий газар, Монголын үндэсний худалдаа, аж үйлдвэрийн танхимтай хамтран зохион байгуулав.

Монгол Улсаас экспортолж буй ургамлын гаралтай түүхий эд, бүтээгдэхүүний экспортын 85 хувь нь БНХАУ-д нийлүүлэгдэж байна. Монгол Улсын Засгийн газар, ХХААХҮЯ-наас газар тариалангийн үйлдвэрлэлийг дэмжих, хөрсний үржил шимийг хамгаалах сэлгээний таримлын нэр, төрлийг олшруулах замаар экспортын бүтээгдэхүүний нэр, төрлийг нэмэгдүүлэх, шинэ зах зээлд гарах боломж, нөхцөлийг бүрдүүлэхэд анхаарч ажиллаж байна.