Японы хамгийн залуу хотын дарга, 36 настай Шоко Кавата жирэмсний амралт авах гэж буйгаа зарлаж, үндэсний хэмжээний мэтгэлцээний бай болж байсан цаг саяхан. Яагаад гэвэл ажил эрхлэлт, улс төрийн тогтолцоонд нь эцгийн эрхт ёс давамгайлдаг улсад хотын дарга эмэгтэй жирэмсний амралтаа авч буй анхны тохиолдол нь Каватагийнх болсон юм. Шоко Кавата 2023 онд Киото мужийн Явата хотын даргаар сонгогджээ. Тэрбээр есдүгээр сарын 15-нд амаржиж, охинтой болсон байна.

Тэгвэл "Time" сэтгүүл түүнийг дэлхийн хамгийн нөлөө бүхий 100 эрхмийн жагсаалтдаа багтаажээ. Шоко Кавата жирэмсний амралт авах гэж буйгаа зарласан нь эхлээд харахад онцын зүйл биш мэт боловч түүхэн шийдвэр байсан гэдгийг тус сэтгүүл онцолсон байна. Түүний хувийн амьдралдаа хийсэн сонголтоос гадна улс төрийн хувьд гаргасан амжилтыг нь ч "Time" сэтгүүл сайшаажээ. Тухайлбал, Шоко Кавата сургуулийн үдийн хоолны үнийг бууруулах зэрэг бодлого баримталсан нь Японыг амьдрахад улам л таатай улс болж байгааг харуулсан гэж үзжээ.

Төрөлт хурдацтай буурч, улс төрийн манлайлалд жендерийн ялгаа ихэссэн энэ үед өөрийнх нь жирэмсний амралт тогтолцоог өөрчлөх хурдасгуур болно гэж Кавата үзсэн юм. Гэвч олон нийтийн сүлжээнд зарим хүн Каватагийн жирэмсний амралтыг "Төрийн албан хаагч ажлын байр дээрээ байхгүй байгаа нь татвар төлөгчийн мөнгийг дэмий үрсэн хэрэг" гэх зэргээр шүүмжилжээ.