Өмнөд Солонгосын Соннам хотод Хятадын дарга Ши Жиньпиний нэрээр нэрлэгдсэн нэгэн ресторан бий. Тус ресторан руу есдүгээр сарын 24-ний өдөр маск зүүсэн дөрвөн хүн халдаж, тавилгыг нь хагалан, лак цацсан хэрэг гарчээ. Халдлагынхаа дараа шууд нутаг буцсан гэх тус этгээдүүд нь хятад үндэстэн бололтой.

Рестораны эзэн хэлэхдээ "Өмнөд Солонгос дахь хамгийн шилдэг хятад ресторан болоосой гэсэндээ Ши Жиньпин гэдэг нэрийг сонгосон. Ямар ч улс төрийн санаа зорилго байхгүй" гэжээ.

"Ши Жиньпин" ресторан найман жил үйл ажиллагаа явуулж байгаа ч нэрээ өөрчил гэсэн шаардлагыг нэг жилийн өмнөөс хүлээж авах болжээ. Тодруулбал, Хятадын дарга Ши Жиньпин өнгөрсөн оны наймдугаар сард Өмнөд Солонгост болсон Ази Номхон далайн эдийн засгийн хамтын ажиллагааны чуулганд оролцох үеэр тус ресторан ийм шаардлага хэд хэдийг хүлээж авсан байна. Шаардлага тавигсдын зарим нь бүр мөнгө хүртэл санал болгосон аж.

Түүнчлэн өнгөрсөн дөрөвдүгээр сард тус рестораны менюд байдаг "Ши Жиньпиний тусгай будаа" нэртэй хоолтой холбоотойгоор нэгэн хүн Өмнөд Солонгосын Оюуны өмчийн яаманд гомдол гаргасан хэрэг гарчээ. Гэхдээ ямар нэгэн зөрчил байхгүй гэж үзсэн тул Оюуны өмчийн яам уг хэргийг хэрэгсэхгүй болгосон байна.

Энэ удаагийн халдлага нь урьд өмнө байгаагүй хэрээс хэтэрсэн хэрэг байсныг рестораны эзэн мэдэгджээ. Эд хогшлын эвдрэл гэмтлийг тооцоод үзвэл хохирлын хэмжээ 15 сая вон буюу 11100 ам.доллар дөхөж байгаа аж. Ресторан халдлагын дараа таван өдөр ажиллаагүй. Түүнчлэн энэ хэргийн дараа рестораны хамт олон шинэ нэр бодож олохоор хичээж байна.

Цагдаагийн байгууллагын мэдээлснээр, халдлага үйлдэгсэд нь 20-40 насны хятад хүмүүс байжээ. Тэднийг халдлага үйлдсэнийхээ дараа Шанхай болон Янтай хотууд руу ниссэн гэж үзэж байна.

"Ши Жиньпин" ресторан нь гол төлөв хятад хоолоор үйлчилдэг. Гэхдээ менюд нь зарим төрлийн солонгос хоол ч байдаг бөгөөд "Google" дээр дөрвөн од (4/5) үнэлгээтэй ажээ.