Италийн алдартай загварын ордон Gucci ирэх жилээс эхлэн захиалгаар моторт завь үйлдвэрлэх болсон тухайгаа зарлалаа. Харин үнийн тухайд хамгийн хямддаа 590 мянган евро буюу 750 мянган ам.доллар байх аж.

Gucci уг хөлөг онгоцоо салбартаа тэргүүлэгч Riva компанитай хамтран бүтээх бөгөөд ирэх жил Gucci-гийн 90 жилийн ой тохиож буйтай холбогдон энэхүү таатай мэдээллийг тансаг, чинээлэг хэрэглэгчдэдээ дуулгаж байгаа юм. Италийн хоёр алдартай компанийн энэхүү хамтын ажиллагааны дүнд тансаг чамин, ганган хээнцэр, дээд зэргийн тохилог моторт завийг үйлдвэрлэх гэнэ. Aquariva нэртэй Gucci-гийн моторт завь нь 10 метр урттай, 380 морины хүчтэй, хоёр ширхэг Yanmar хөдөлгүүртэй, дээд хурд нь 41 нот байх ажээ.

Түүнчлэн Aquariva-гийн худалдан авагчдад аяллын цүнх, спорт хэрэглэл, ванны алчуур зэрэг далайд аялалд гарахад хэрэглэх хэрэглээний зүйлсийг мөн дагалдуулах гэнэ. Харин тэдгээр нь бүгд Gucci брэндийн бүтээгдэхүүн байх юм.

Зургийн цомогийг ЭНД дарж үзнэ үү.