ОХУ-ын төрийн өмчит эрчим хүчний томоохон компани “Газпром” Армени руу нийлүүлэх байгалийн хийн экспортыг есдүгээр сарын 16-25-ны хооронд түр зогсооно гэж мэдэгджээ. Энэ нь хийн хоолойн төлөвлөгөөт засвар үйлчилгээтэй холбоотой аж.

ОХУ-ын өмнөд хэсгээс Гүржээр дамжин Арменид хий нийлүүлдэг Хойд Кавказ–Закавказийн хийн хоолой өнөөдрөөс (2026.09.15) эхлэн үйл ажиллагаагаа зогсооно. Засварын ажил есдүгээр сарын 25 хүртэл үргэлжлэх аж.

“Газпром Армени”-ийн мэдээлснээр, засварын хугацаанд хэрэглэгчдэд шаардлагатай хийг дотоодын нөөцөөс болон Иранаас нэмэлтээр импортлон нийлүүлэх юм байна.

Ийм төрлийн засварын ажлыг өнгөрсөн оны есдүгээр сард мөн хийж байжээ.

ОХУ 2025 онд Арменид 2.7 тэрбум шоо метр байгалийн хий нийлүүлсэн нь тус улсын нийт импортын 82 хувийг эзэлжээ. Хоёр улсын гэрээний дагуу ОХУ Арменид 1,000 шоо метр хийг 177.5 ам.долларын хөнгөлөлттэй үнээр нийлүүлдэг. Уг гэрээ энэ оны эцэст дуусах юм.

Түүнчлэн хий нийлүүлэлт түр зогсож байгаа нь хоёр улсын харилцаа муудаж буй үед тохиож байна. Армени нь албан ёсоор ОХУ-тай холбоотон боловч сүүлийн жилүүдэд Европын холбоотой илүү ойртох алхмуудыг хийж буй. Энэ нь Кремлийн дургүйцлийг төрүүлээд байгаа юм.

ОХУ-ын ерөнхийлөгч Владимир Путин Арменийг Европын интеграцчиллыг гүнзгийрүүлэх эсвэл Москва тэргүүтэй Евразийн эдийн засгийн холбоонд үлдэх эсэх асуудлаар бүх нийтийн санал асуулга явуулахыг шаардсан байна.

Харин Арменийн ерөнхий сайд Никол Пашинян өнгөрсөн сард тус улс ойрын хугацаанд Европын холбоонд элсэх хүсэлтээ албан ёсоор гаргаж эхэлж магадгүй гэж мэдэгджээ.

Тэрбээр мөн өнгөрсөн долоо хоногт Армени улс эрчим хүчний эх үүсвэрээ төрөлжүүлж, ОХУ-аас хамааралтай байдлаа бууруулах чиглэлд ажиллана гэж мэдэгдсэн байна.