УИХ-ын гишүүн Л.Оюун-Эрдэнэ өнөөдөр /2026.09.15/ цаг үеийн асуудлаар сэтгүүлчдийн асуултад хариулт өглөө.

-УИХ-ын гишүүн А.Ариунзаяатай холбоотойгоор МАН-ын бүлэг 30, 38-аараа хуваагдан талцаж байна гэх таамаг байна. Энэ талаар тайлбар, мэдээлэл өгөөч?

-Миний хувьд бүлгийн хурлаас мэдээлэл авах гэж байна. Хэд хоногийн өмнө байгаль орчны асуудлаар УИХ-ын дарга С.Бямбацогт, Ерөнхий сайд Н.Учралтай уулзсан. Маш урт уулзалт болсон. Бараг 5-6 цаг болсон. Тэр үед уур амьсгал зүгээр байсан. Намрын чуулганаар хэлэлцэх асуудлын талаар ярьсан. Сүүлийн хоёр хоногт л гэнэтийн сюрприз боллоо. Гэнэт л нэг өдөр Д.Амарбаясгалан, Х.Булгантуяа хоёр хөөгдсөн асуудал гарсан. Гэнэт Х.Нямбаатарт махны үнийн асуудлыг нааж эхэлсэн. Одоо гэнэт л С.Амарсайхан их муу хүн болж байх шиг. Миний хувьд том зургаа хараад, дараагийн төсөл, хөтөлбөрөө хэрхэн хэрэгжүүлэх вэ гэдэгт анхаардаг.

Парламентынхан ч тэр анхаардаг болохгүй бол монголын парламент нэг удганы хэрэг шүүдэг түвшинд л хүрээд байна.

Нэг хэсэг муу ч, сайн ч энэ төслийг хэрэгжүүлэх нь зөв үү, буруу юу гэдэг зүйлийг парламент ярьдаг байлаа. Одоо бол хайран л цаг байна. Ажлаа яриад, хов жив хөөлгүй, айл гэрийн ар гэр рүү өнгийсөн зүйлээ багасгавал яадаг юм бэ гэж бодож байна.

-Хууль зүйн сайд С.Амарсайханы ард захиалгатай, МАН-ын нэр бүхий улстөрч байгаа гэх мэдээллийг УИХ-ын гишүүн өгсөн. Үүн дээр ямар байр суурьтай байна вэ?

-Манай мөртөстнүүдийн хувьд салбарын сайдынхаа эсрэг мэдэгдэл хийж байна гэдэг бол ойлгомжтой. Хууль зүйн сайдаас дээгүүр албан тушаалтан чиглэл өгч байж л ийм зүйл болно. Өмнө нь Хууль зүйн сайд Х.Тэмүүжин дээр нэг ийм асуудал үүсэж байсан. Ер нь юм хуулийнхаа дагуу, эрэмбэ эрэмбэндээ л байхгүй бол нэгдсэн удирдлага алга болно. Миний бодлоор үүнийгээ бүлэг дээрээ нээлттэй ярьцгаагаасай гэж бодож байна. Хүн чанарын хувьд онцгүй л зүйл санагдаж байгаа.

-Эрэмбээрээ байна гэдэг нь хууль бус асуудлыг нуун дарагдуулна гэсэн үг үү?

-Би тэрийг ойлгож байна. Гэхдээ мэдээж тийм асуудал байгаа бол ярилгүй яах вэ. Гэхдээ яагаад заавал одоо гаргаж ирээд байна вэ. Намрын чуулганы өмнө гэнэт л тогонд цохиулсан юм шиг гаргаж ирж байгаа нь улс төрийн агууламжтай байгаа нь ойлгомжтой. Тийм учраас удирдлагууд маань үүнийгээ том зургаар нь хараасай. Сонгууль хаяанд ирлээ шүү.

-Засгийн газрыг тогтвортой ажиллуулах талыг та юу гэж харж байна. Ардчилсан намын зүгээс өчигдөр байр сууриа илэрхийлсэн. Ерөнхий сайд Н.учрал итгэл үзүүлэх асуудлыг УИХ- д оруулах ёстой гэх асуудал хөндсөн. Засгийн газар тогтвортой ажиллах эсэх нь 30-ын бүлгээс хамааралтай болж байна? 

-Засгийн газар огцроод нөхцөл байдал сайжрах уу гэдэгт эргэлзэж байна. Энэ нөхцөл байдлуудыг зөв дүгнээд, ард нь гарах хэрэгтэй. Сөрөг хүчин ажлаа хийлгүй яах вэ. Эрх баригчид бас өөрийн ажлаа хийх ёстой. Ер нь яах вэ дээ, харж байхад манайхан сэтгэл хөөрлөөр л хандсан. Хамтарсан Засгийн газар байгуулагдаад, төслүүд явж байх үед хэдэн хүн сайд болох гээд л.

Ардчилсан намд хамаг л гоё яамаа өгчихөөд байна гэсэн ийм л асуудал үүссэн.

Эдийн засгийн яам, Уул уурхайн яам, Хууль зүйн яамаа өгчихлөө гээд л жижиг сажиг шалтаг гаргаж ирсэн. Ингэж явж байгаад л дангаараа засаглана гэсэн. Дангаараа засаглаад, "Алтан өргөө" киноны Ёроо, Ёмбо шиг зүйл болсон. Авдарт алт эрдэнэс байгаа гээд нээсэн шиг юу ч байхгүй. Усгүй ган гачиг болдог шиг ийм л зүйл болсон.

Б.Энхбаяр тэргүүтэй далдакуудаас болж л ийм зүйл болсон. Нөхцөл байдал хүндрээд ирсэн чинь "Би үхэхээр чи үх" гэдэг шиг энд А.Ариунзаяа буруутай байна, С.Амарсайханаас боллоо гэх мэт ийм явуургүй улс төрөөр хол явахгүй дээ.

Улам л нөхцөл байдлыг хүндрүүлнэ. МАН-ын хувьд ажлаа хийх цаг, ард түмэнд амласан мөрийн хөтөлбөрөө л биелүүлэх цаг.

-МАН хагарлаа хэр удаан үргэлжлүүлэх юм бэ? 

-Ерөнхий сайд Н.Учралыг би ойлгож байна. Би өмнө нь Н.Учралд "Өөрийн толгойтой байгаарай. Өөрийн толгойтой байвал түүхэнд үлдэх Ерөнхий сайд болох байх аа. Өөрийн толгойгүй байвал хананд зургаа өлгүүлсэн л түр хугацааны Ерөнхий сайд болно" гэж хэлж байсан.

Энэ бүх хов жив, элдэв бусын зүйлс Н.Учралаас үл хамаарч явж байгаа болов уу л гэж найдаж байна.

Н.Учрал өөрөө улс төрийн дүгнэлт хийх ёстой. Бүх хариуцлагатай ажлуудыг хийж үзсэн. Өөрийн тооцоогоор улс төрөө хийхгүй бол хүний тооцоогоор, хүний гар хөл болж энэ том нам ажиллаж болохгүй ээ. Өөрийнхөөрөө байх ёстой. Ерөнхий сайд асан Г.Занданшатар Б.Энхбаяраар хөлөө боолгож унасан. Н.Учрал одоо хоолойгоо боолгож унаж магадгүй.  Ийм л зүйл болж байгаа. Засгийн газрын Хэрэг эрхлэх газар бол эв нэгдлээр хангах ёстой газар. Би цагдаагийн мэдэгдэл энэ тэрийг Б.Энхбаяр хийсэн байх өндөр магадлалтай гэж хардаж байгаа.