Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв өнөөдөр /2026.09.09/ шатахуунтай холбоотой цаг үеийн асуудлаар ээлжит мэдээлэл хийв.

Тэрбээр “Өнгөрсөн 24 цагийн хугацаанд Улаанбаатар хотын 96 ШТС-д 1,037 тонн АИ-92 шатахуун, орон нутгийн 65 ШТС-д 808 тонн автобензин түгээхээр ачилтад гаргасан. Өмнө мэдээлж байсанчлан, хөдөө орон нутгийн шатахууны хангамжийг сайжруулахад анхаарч ажиллаж байна. Өнөөдрийн байдлаар 40 тонн шатахуун буулгалтад бэлэн болсон. Улмаар орон нутгийн түгээлтийг нэмэгдүүлэх хүрээнд аж ахуйн нэгжүүд ажиллаж байна. Монгол Улсад газрын тосны хомсдол нүүрлэж, үнэ огцом өсөх нөхцөл байдал үүссэнтэй холбоотойгоор энэ нөхцөл байдлыг маш богино хугацаанд бууруулах, шатахууны эх үүсвэрийг нэмэгдүүлэх чиглэлээр ажиллаж байна.

Олон эх үүсвэрийг нэмэгдүүлэх хүрээнд ОХУ, БНХАУ, БНСУ болон бусад холбогдох улс орнуудаас авах бүтээгдэхүүний хэмжээг нэмэгдүүлэх талаар хэлэлцээ хийж байна.

Есдүгээр сарын захиалга хэвийн үргэлжилж байгаа. Бид Монгол Улсад газрын тос боловсруулах үйлдвэрийг 2028 оны эхний улиралд ашиглалтад оруулахаар ажиллаж байна. Уг үйлдвэр нь жилд 1.5 сая тонн газрын тос боловсруулах хүчин чадалтай. Шатахууны тасалдал, хомсдол бий болгохгүй, тогтвортой байдлыг хангах хүрээнд Аж үйлдвэр, эрдэс баялгийн яамнаас санаачлан газрын тосны сав, агуулахын хэмжээг нэмэгдүүлэх бодлогын ажил хийж байна. Өнөөдрийн тулгамдаж буй хамгийн том асуудал бол нөөц бүрдүүлэх сав, агуулахын багтаамж юм. Монгол Улсын хэмжээнд гурван сарын шатахууны нөөц хадгалах агуулахуудыг барьж байна” гэв.