“Оюу толгой” ХХК-ийн гүйцэтгэх захирал С.Мөнхсүх гүний уурхайн лифтэнд байсан 40-өөд залуустайгаа болсон үйл явдлын талаар ярилцаж, санаа бодлыг нь сонсчээ.

Тэрбээр "Тухайн үед юу болсон, авсан арга хэмжээ, залууст маань юу мэдрэгдсэн, бодогдсон, ямар хүндрэл гарсан талаар сонслоо. Бүгчим, давчуу орчинд хөдлөх зайгүй, зургаан цаг орчим байна гэдэг хүнд. Лифт мөн огцом зогссон. Тэр хугацаанд айдас, найдвар, гомдол, эргэлзээ, бухимдал зэрэг төрнө. Сэтгэл зүйн хувьд хүнд, ар гэрийнхэн нь санаа зовсон нь гарцаагүй. Лифтэнд нэгнийхээ сэтгэлийн засч, дэм өгч, санаа тавьж аль болох тайван байж давж гарсан, цаашид юунд анхаарах тухай хэлж сануулж, ний нуугүй ярилцсанд хамт олондоо баярлалаа. Хариу арга хэмжээ санаснаас удааширсан. Алхам бүрийг найдвартай, алдаа мадаггүй жин тан явуулахад олон хэлтэс баг зэрэг, амь нэгтэй чамбай ажиллажээ. Ажлаа дутуу хөтүү биш, хариуцлагатай хийнэ гэдэгт итгэж, нэг цул болж манайхан ажилладаг. Ямар ч төлөвлөгөө хүний аюулгүй байдлаас дээгүүрт тавигдахгүй. Үүнийг сануулсан сургамж боллоо. Өнөөдөр ний нуугүй ярилцаад бүр ч их ойлголоо. Бүгд эсэн мэнд аюулгүй гарсан нь чухал ч, “бүгд зүгээр өнгөрсөн” гээд орхих асуудал огт биш. Хариу арга хэмжээ авахад багагүй хугацаа орсон, мэдээлэл хангалттай байгаагүй гэх мэт сайжруулах суралцах олон зүйл байна. Яаралтай авах хариу арга хэмжээгээ үнэлж дүгнэнэ, улам чамбайруулна. Юуг засах, сайжруулах, илүү сайн хийх ёстойгоо тогтоож, хүнээ илүү сонсч анхаарч, хийх ёстой ажлаа бид хийнэ" гэсэн байна.