УИХ-ын ээлжит бус чуулган зарлагдаж, 2026 оны төсвийн тодотгол хэлэлцэж буй энэ өдрүүдэд УИХ-д суудалтай зарим намууд Н.Учралд хайр зарлаж эхлэв. Өргөн хэрэглээний барааны үнэ өссөн, шатахууны үнэ өссөн гээд угаасаа ард түмний амьдрад хүндхэн байгаа энэ цаг үед Н.Учралын Засгийн газар цаашид тогтвортой ажиллах эсэх нь эргэлзээтэй байгаа. Тиймээс ч УИХ-д суудалтай зарим намууд Н.Учралын Засгийн газрыг тогтвортой ажиллуулахаа мэдэгдэж эхлэв. УИХ-ын ээлжит бус чуулганы хуралдаанаар 2026 оны төсвийн тодотгол хэлэлцэж байх үеэр ИЗНН-ын гишүүн М.Нарантуяа-Нара гишүүн Н.Учралын засгийн газрыг унагаж болохгүй, ажлаа сайн хий гэсэн үг дайв. Ингэхдээ Н.Учралын Засгийн газрыг огцруулахгүй, зөвхөн Т.Аубакир сайдад хариуцлага тооцох ёстой гэдгийг хэлэв. ИЗНН бол УИХ-д суудалтай намуудын нэг бөгөөд УИХ-д дөрвөн суудалтай. Жагсаалтын эхэнд бичигдсэн дөрвөн гишүүн нь дотроо ч учраа олж чадахгүй, намынхаа тамгыг булаацалдаж байгаа хэрнээ хүний намын даргын асуудалд М.Нарантуяа-Нара гишүүн санаа тавьж сууна.

Н.Учралын Засгийн газрыг унагахгүй байх хүсэл ганц М.Нарантуяа-Нарад бус ХҮН намд ч байна.  Өнгөрсөн долоо хоногт ХҮН намын төлөөллийн төв байгууллага болох Төлөөлөх зөвлөл хуралджээ. Энэ удаагийн хурлаар хэд хэдэн асуудал хэлэлцсэний нэг нь Н.Учралын тэргүүлсэн Засгийн газрыг огцруулахгүй, тогтвортой ажиллуулах нэгдсэн шийдвэрт хүрчээ. ХҮН намын хувьд мөн л УИХ-д суудалтай намуудын нэг бөгөөд УИХ-д 8 суудалтай. Түүгээр зогсохгүй тус нам Засгийн газарт хоёр сайдын суудалтай. Тиймээс Н.Учралын Засгийн газар унавал ХҮН намынхан ч хоёр сайдгүй болно. Нөгөө талдаа Н.Учралын Засгийн газар унавал дараагийн Засгийн газарт ХҮН нам орно гэдэг юу л бол. Тиймээс хоёр сайдын суудлаа хамгаалахын тулд Н.Учралд “хайр зарлаж” явна, ХҮН намынхан.

Т.ОД