Өнгөрсөн долдугаар сарын 9-ний өдөр Зэвсэгт хүчний 032 дугаар ангийн алба хаагч Ц.Л ажлаасаа гараад хоёр сарын турш сураггүй болсон. Түүнийг алга болсноос нь ердөө нэг хоногийн дараа буюу долдугаар сарын 10-нд Г гэгч согтууруулах ундаа хэрэглэсэн үедээ түүнтэй маргалдаж, улмаар хутгалж амь насыг нь хохироосон хэрэг гарсан. Энэ талаар Батлан хамгаалахын сайд Д.Батлут мэдээлэхдээ "Ангийн байгууллагын удирдлагуудаас тодруулж асуусан. Долдугаар сарын 9-ний өдөр харуулын үүрэг гүйцэтгэж байгаад долдугаар сарын 20-ныг хүртэл амарсан.

Амралтын үеэр энэ хэрэг болсон гэж бодож байна. Анги, байгууллага дээр ямар нэгэн зүйл болоогүй.

Тухайн алба хаагч долдугаар сарын 17-ны өдөр үүрэг гүйцэтгэх байсан. Тухайн үүргийг гүйцэтгээгүй учраас ангийн захирагч сахилгын шийтгэл оногдуулсан. Долдугаар сарын 22-нд дахин ажилдаа ирэхгүй болохоор нь ар гэрийнхэнд нь хандсан. Ар гэрийнхэн нь цагдаад мэдэгдсэн. Ингээд хамтран ажилласан. Манай ангийнхан ар гэрийнхэнтэй нь 2-3 удаа уулзсан. Би энэ талаар нарийн зүйл мэдэхгүй байна. Тухайн ангийн захирагчаас авсан мэдээлэлтэй л байна. Цэргийн алба хаагчдын амь нас, эрүүл мэндийг эрсдэлд оруулахгүй байх реформыг эхлүүлж байгаа” гэв.