Харин Ардчилсан намын хууччуул бие, сэтгэлийн чилээ гаргахуйц улстөржсөн мэтгэлцээнээр хэвлэлийн хуудаснаа байлдаж гишүүдээ баясгав.
Хөндлөнгөөс харахад сэтгэл түгшим энэхүү талцал үнэн хэрэгтээ тус нам эрүүл байгаагийн эхний шинж тэмдэг гэж намын удирдлагууд тайлбарлаж байна. Тус намыг хоёр салаа замаар замнах нь, дэд намтай болчихоод ирэх сонгуулиар хоорондоо өрсөлдөж “золигтох” нь гэсэн ойлголт газар аваад буй. Үндэсний зөвлөлдөх хорооны хурлаа тэсэн ядан хүлээж “мина зэхэж” байгаа энэ нөхцөлд АН доторх фракциуд, түүний гишүүд өөр хоорондоо үл итгэлцэх байдал үүсээд байгааг ч тус намын гишүүд нуухгүй байна. ҮЗХ-ны хурлыг зарласнаар фракциудын амбиц оргилдоо хүрч хамтарсан Засгийн газрын насыг тоолж магадгүй байгааг ч АН-ын зарим гишүүн эртнээс анхааруулаад байгаа билээ.
Улс орны амьдралтай холбоотой дараагийн үйл явдал нь “Дисковер Монголиа-2010” чуулга уулзалт байлаа. Дэлхий цугласан хэмээн бахархан өргөмжилсөн уг чуулга уулзалтад дэргэдэх “нөхөр” маань ирсэнгүй. ОХУ-ын төлөөлөл ирээгүй нь Монголын уул уурхайн салбар хамаагүй гэсэн ихэрхэл үү. Аль эсвэл “Монголыг сонирхохгүй байгаа” хэмээн хэвлэлээр мэдэгдсэнээ батлах гэж гэдэн нь хөдлөв үү хэмээх хардлага төрүүлсэн ч Оросын талынхан үүний шалтгааныг эергээр тайлбарлахыг хичээж байна. Учир нь “Дисковери”-тэй яг давхцан Эрхүүд эдийн засгийн форум болсон гэнэ. Харин ч үүнд монголчууд ирээгүй нь харамсалтай гэж их гүрнийхэн хариу тунирхаж суугаа ажээ. Түүнчлэн Кремльд Монгол Улсын Ерөнхийлөгч, Ерөнхий сайдыг зайлшгүй хүлээн авах цаг болсон. Харин хэнийг нь вэ гэдэг асуудал хүчтэй ярьж эхэлснийг ч эх сурвалж хэлсэн юм. Нөгөөтэйгүүр Монголд албан ёсоор яаруу давчуу айлчлаад буцсан Д.Медведев, В.Путин нарыг ямар ч асуудал шийдэлгүй, үр дүнгүй “рейс” хийснийх нь төлөө буруутгах хүн Кремльд цөөнгүй байгаа ажээ.
Одоогоор Монголын тал нутагт Москвагаас хоёр элч довтолгоод байгааг улс төрийн хүрээнийхэн ч төдийлөн мэдээгүй бололтой. Тэдний нэг нь ОХУ-ын Ерөнхийлөгчийн тусгай төлөөлөгч А.В.Гордеевийн зөвлөх М.В.Васильев, нөгөө нь Дорно дахины хүрээлэнгийн Монголын хэлтсийн эрхлэгч В.В.Грайворонский нар юм.
Түүнчлэн өнгөрсөн баасан гарагт болсон шинэ төмөр замын суурь бүтэц барих уралдаант шалгаруулалтын өмнөх зөвлөлдөх уулзалт улс төрийн хүрээнд анхаарал татсан үйл явдлуудын нэг мөн байлаа. Үүний зэрэгцээ төмөр замын даргыг түр томилсон хугацаа дуусчихаад байхад ажрахгүй байгаа тус салбарынхан хийгээд Засгийн газрын зүгээс ирэх сарын эхээр төмөр замын хороог хуралдуулж, удирдлагын асуудлыг хэлэлцэхээр болжээ. Монголын төр нэгэн цаг үед асар том алдаа гаргаж, үүний улмаас 37 мянган хүнээ улс төрийн хилс хэрэгт хэлмэгдүүлж, 20 гаруй мянгынх нь аминд хүрсэн гашуун дурсамж жил бүрийн есдүгээр сарын 10-нд Монгол орныг бүхэлд нь нөмөрдөг. Монгол төрийн түшээд энэ өдөр намын ялгаа, хийрхэлгүйгээр улс төрийн хилс хэрэгт хэлмэгдэгсдийн хөшөөнд цэцэг өргөн хүндэтгэл үзүүллээ. Харин түүхэнд уг хар хэргийн гол буруутнаар тэмдэглэгдэн үлдсэн Оросуудаас уг хүндэтгэлд ганц ч хүн оролцсонгүй. Тэр ч байтугай уучлал хүссэн нэг үг, өгүүлбэр ч илгээсэнгүй. Монгол Улсын анхны Ерөнхийлөгч П.Очирбат 1993 онд ОХУ-д айлчлахдаа энэ талаар хөндөж ярьсан боловч их өрийн асуудлаар хэргийг хаав уу гэлтэй төрийн тэргүүнүүдийн хооронд эмзэг сэдвээр дахин сөхөлгүй хаясан. Манай орны хамаг баялгийг хуваалцаж, тэр ч байтугай сорчилж ашигладгаа улс төр, эдийн засгийн найрсаг харилцаа хэмээн томьёолдог их гүрний дээрэнгүй бодлогын хар ул мөрийн талаар толгой гудайхгүй байгаад нь хэлмэгдэгсдийн ар гэрийнхэн сэтгэл дундуур явдаг юм билээ. Оросууд хэзээ уучлал гуйх вэ. Олон жил хүлээж, горьдсон хүмүүсийн сэтгэлд нөхөж баршгүй гарз учирсан ч тэдний ёс төдий уучлал гуйх төдийд гуниг дундарч гомдол тайлагдах нь ойлгомжтой.
Ийнхүү өнгөрсөн долоо хоногт улс төр, эдийн засгийн амин чухал асуудлаар өрнөсөн ил, далд үйл явдлаар баян байлаа. Ирэх өдрүүдэд УИХ-ын эрхэм гишүүд тойрогтоо хэрхэн ажилласнаа тайлагнах, намын хурлуудад тавих асуудлаа бэлтгэх зэргээр улс төрийн амьдрал намуухан үргэлжлэх төлөвтэй байна.
У.ОРГИЛМАА
Зохиогчийн эрх:
"Улс төрийн тойм" сонин