Киев хотын хүүхдийн эмнэлэгт пуужингийн цохилт өгөхийг тушаасан гэж буруутгагдаж буй Оросын генерал есдүгээр сарын 3-ны өдөр Саратов мужийн Энгельс хотод хэд хэдэн удаа буудуулжээ. Түүний нүүр болон бие рүү нь буудсан бөгөөд одоогоор Москвагийн эмнэлэгт эмчлүүлж байгаа аж. Оросын Мөрдөн байцаах хороо уг хэргийн мөрдөн байцаалтыг эхлүүлсэн ч чухам хэн гэдэг генерал болохыг зарлаагүй. Гэхдээ Оросын телеграм сувгуудаар түүнийг Агаар, сансрын хүчний генерал Николай Варпахович байсан гэж өргөнөөр мэдээлж байна.

Украины ерөнхийлөгч Зеленский өдөр тутмын мэдэгдэлдээ энэ хэргийн талаар дурдаад, "Бид Орост хариу арга хэмжээ авч, өөрсдийн ажиллагааг явуулна. Оросын гэмт хэрэгтнүүд нуугдаж чадахгүй, тэднийг олох л болно. Саратов мужид болсон явдал үүнийг дахин баталж байна" гэжээ.

Николай Варпаховичийг 2024 оны долдугаар сард Киевийн Охматдыт эмнэлэгт пуужингийн цохилт өгөхийг тушаасан гэж Украин буруутгаад байв. Тус цохилтын улмаас гурван хүн амь үрэгдэж, хэдэн арван хүн шархадсан. Мөн эмнэлгийн хэд хэдэн тасаг, түүний дотор эрчимт эмчилгээний тасгууд, хавдар судлал, мэс заслын тасаг, хор судлал, гэмтлийн төв эвдэрч сүйдсэн байна. Энэ хэргийн төлөө Европын холбоо тэргүүтэй улс орнууд Варпаховичид хориг арга хэмжээ авчээ.

Саратов мужийн Энгельс хотод Оросын стратегийн бөмбөгдөгч онгоцны флотын төв бааз байрладаг. Тус баазад Оросын Украины эсрэг түлхүү ашиглаж буй Ту-95МС, Ту-160 зэрэг онгоцууд байдаг.