Хөдөө аж ахуйн салбарт олгож буй татаас, урамшуулал ямар үр дүн өгч байгаа, түүнийг хэрхэн захиран зарцуулж байгаа эсэх асуудлаар сонсгол зохион байгуулна.

УИХ-ын гишүүн М.Мандхай:

-Монгол Улсад хүнсний бүтээгдэхүүний үнийн өсөлт, дотоодын хүнсний хомсдол, импортын бүтээгдэхүүн нэмэгдэж байгаа нь тулгамдсан асуудал болоод байна. Энэ бүх асуудал юунаас үүдэж байгааг тодруулах ажлын хэсэг байгуулагдсан. 2008 оноос хойш хөдөө аж ахуйн салбарын бүх бүтээгдэхүүнд, урамшуулал олгох 29 аян, арга хэмжээг зохион байгуулсан байна. Гэтэл дэмжлэг үзүүлээд байхад үнэ нэмэгдээд байгаад өөр хүчин зүйл байна уу гэж харсан. Тиймээс үүнийг шалгах нэр бүхий гишүүд нийлж ажлын хэсэг байгуулсан.

2015-2025 оны тоон мэдээллийг гаргалаа. Энэ хугацаанд хөдөө аж ахуйн салбарт 1.3 их наяд төгрөг зарцуулсан байна. Мөн энэ хугацаанд хөдөө аж ахуйн салбарын төсөв тав дахин нэмэгдсэн.

Үндсэндээ нийт төсвийн 50 хувийг татаас, урамшуулал, хөнгөлөлттэй зээлд зарцуулж байна. Гэтэл төсвийнхөө тал хувийг хөнгөлөлттэй зээл, урамшуулалд зарцуулаад байхад хөдөө аж ахуйн салбарт ямар үр дүн гарсан бэ?

Энэ мөнгийг зарцуулсан үр дүнгийн талаар холбогдох хүмүүсээс асуухаар бидэнд мэдээлэл хангалттай өгсөнгүй. Өөрөөр хэлбэл, энэ арван жилийн  хугацаанд хэдэн аж, ахуй нэгжид хэчнээн төгрөгийн зээлийг ямар зориулалтаар өгсөн юм, зээлийн эргэн төлөт ямар байгаа, өр төлбөрийн хэмжээ, үр дүнгийн талаар мэдээлэл алга. Тиймээс салбар хариуцсан хүмүүс нь энэ долоо хоногтоо багтаад мэдээллээ өгөхөөр боллоо. Ирүүлсэн мэдээллийг нягталж, шинжлээд есдүгээр сарын 28, 29-нд болох “Хүнс, хөдөө аж ахуй, хөнгөн үйлдвэрийн салбарт 2008 оноос хойших хугацаанд төрөөс олгож байгаа дэмжлэг урамшуулал, Засгийн газраас хариуцан төлж байгаа зээлийн хүүгийн татаас олголтын байдал, хэрэгжилт” сэдэвт Ерөнхий хяналтын сонсгол хийж, иргэдэд мэдээлэл өгнө. Энэхүү сонсголын үр дүнд хөдөө аж ахуйн салбарт олгож байгаа татаас, урамшуулал үр дүнтэй эсэхийг хэлэлцэнэ. Өөрөөр хэлбэл, хэдэн их наядын урамшуулал олгоод байхад хүнсний бүтээгдэхүүний үнэ яагаад өсөөд байгаа юм, импортын хамаарал буурч байна уу, дотоодын үйлдвэрлэл өсөж байна уу гэдгийг харна. Үндсэндээ эндээс төрийн татаас урамшууллыг хэрхэн оновчтой зарцуулах шийдлийг хэлэлцэнэ. Иргэд өөрсдийн саналаа хэлж болно гэв.