Украины нийслэл Киев хотын захад байрлах "Konvi" хэвлэх үйлдвэр Оросын пуужингийн цохилтод өртсөний улмаас хичээлийн шинэ жилийн босгон дээр олон мянган сурах бичиг шатаж, үгүй болжээ. Тухайн үед үйлдвэр 1.3 сая ширхэг сурах бичиг хэвлэн нийлүүлэхээр үйлдвэрлэлээ эрчимжүүлээд байсан. Энэ нь Украин даяар хэрэглэх нийт сурах бичгийн 10 хувь нь юм.

"Konvi" хэвлэх үйлдвэрээс аврах боломжтой зүйл бараг үлдээгүй бөгөөд үүнийг Оросын санаатай үйлдэл гэж үзэж буйгаа үйлдвэрийн захирал Виктория Хайдай хэлжээ. Тэрбээр "Оросууд хэвлэх үйлдвэрүүдийг устгаж, Украиныг үндэстнийх нь хувьд арилгахыг оролдож байна. Гэхдээ үнэнийг хэлэхэд тэд үүндээ хэзээ ч хүрч чадахгүй" гэжээ.

ОХУ сүүлийн үед Украин даяар 40 орчим хэвлэх үйлдвэрт цохилт өгснөөр 12 сая орчим ном, сурах бичиг, түүх, соёлын дурсгалт зүйл устаж, үгүй болжээ. Украины нийт ном хэвлэлийн гуравны нэг нь энэ жил устаж үгүй болсныг хэвлэлд мэдээлж байна. ОХУ хэвлэлийн газрууд гэлтгүй хуучин номын захуудыг ч онилсноор үнэлж баршгүй олон ховор ном үнсэн товрог болжээ.

Музей, урлагийн галерей, кино студи, номын сан, дуурийн театрууд ч мөн эвдэрч сүйджээ. Тухайлбал, дундад зууны үеийн соёлын томоохон өв болох Киев-Печерскийн Лавр цогцолборт байрлах Успений сүмийн алтан бөмбөгөр орой цохилтод өртсөн байна. Сүмийн засварын ажилд 11.2 сая ам.доллар шаардлагатай бөгөөд засвар хоёр жил үргэлжилнэ гэж тооцоолж байна.

Тус цогцолборт Украины Ном, хэвлэлийн музей мөн байрладаг. ЮНЕСКО уг цогцолборыг 1990 онд Дэлхийн өвийн жагсаалтад бүртгэсэн бөгөөд 2023 оны есдүгээр сард аюулд өртсөн дэлхийн өвийн жагсаалтад оруулжээ.