Үндэсний аудитын газраас улс төрийн намуудад олгосон төрийн санхүүжилтийн зарцуулалт, тайлагналд аудит хийжээ.

Аудитаар төрөөс улс төрийн намуудад олгосон нийт 6.9 тэрбум төгрөгийн санхүүжилтээс 191.5 сая төгрөгийг зориулалтын дагуу зарцуулаагүй зөрчил илэрсэн байна.

Мөн төрийн санхүүжилтийн зарцуулалт, тайлагналын шалгуур тодорхой бус, төрөөс олгосон санхүүжилтийг бусад эх үүсвэрийн орлогоос тусад нь тайлагнаагүй, шилэн дансны мэдээллийг хуульд заасан шаардлагын дагуу ил тод мэдээлэхгүй байгаа зэрэг зөрчил, дутагдал илэрчээ. Тухайлбал, аудитын дүгнэлтэд төрөөс олгосон санхүүжилтийг зориулалтын дагуу зарцуулаагүй улс төрийн намуудын зарцуулалт дараах байдлаар дурдагдсан байна.

• Монгол Ардын нам – 51.8 сая төгрөг
• ХҮН нам – 44.1 сая төгрөг
• Иргэний зориг Ногоон нам – 9.9 сая төгрөг
• Монголын Ногоон нам – 61.5 сая төгрөг
• Монголын Үндэсний Ардчилсан нам – 24.4 сая төгрөг

Үндэсний аудитын газраас улс төрийн намуудад төрөөс олгосон санхүүжилтийг хуульд нийцүүлэн зарцуулах, бүртгэх, тайлагнах, зарцуулалтыг ил тод мэдээлэх чиглэлээр зөвлөмж хүргүүлжээ. Аудитын дэлгэрэнгүй тайланд төрийн санхүүжилтийн зарцуулалт, тайлагнал болон шилэн дансны мэдээллийн ил тод байдалтай холбоотой бусад асуудлыг тусгасан байна.