Хууль зүй, дотоод хэргийн сайд С.Амарсайхан ЦЕГ-ын дарга нарт хууль бус алт олборлолт, байгаль орчны эсрэг гэмт хэрэгтэй тэмцэх ажилд хариуцлагагүй хандсан албан тушаалтнуудад хариуцлага тооцож, ажлаас нь чөлөөлөх үүргийг Цагдаагийн удирдлагуудад өгөв.

Хууль зүй, дотоод хэргийн сайд С.Амарсайха тэрбээр, "Хууль бус хэрэг хийсэн этгээдүүдэд хуулиа хатуу хэрэгжүүлж, хариуцлага тооц. Монгол Улсын хэмжээнд байгаа хууль бус ашигт малтмал олборлолт тэр дундаа зөвшөөрөлгүй алт олборлож байгаа үйл ажиллагаатай хатуу тэмц. Төв, Булган, Сэлэнгэ болон бусад аймгуудад хууль бусаар ашигт малтмал олборлож байгааг шалгаж, таслан зогсоож хуулийн хүрээнд арга хэмжээ ав. Хууль бусаар ашиглаж байгаа техникийг нь хураа. Хууль бус ашигт малтмалын цаана хэдэн зуун тэрбум төгрөгийг татварын асуудал бий. Энэ мэт олон асуудал байгаа.

Мөн хууль бус гэдгийг нь мэдсээр байж ажлаа хийхгүй, тэдгээрийн гар хөл болж байгаа тухайн орон нутгийг хариуцсан албан тушаалтныг шалга.

Өөрөөр хэлбэл, хууль бус үйл ажиллагааг дэмжиж ажилласан албан тушаалтан байвал шалгаж тогтоогоод, ажлаас нь чөлөөлж хариуцлага тооц. Одооноос эхлэн олон жилийн турш бугшсан хууль бус олборлолттой тэмцэж, шалгах хэрэгтэй. Төр хуулиа хэрэгжүүлж хариуцлага тооцох хэрэгтэй байна" гэлээ.