Ардчилсан намаас өнөөдөр /2026.08.27/ долоо хоног бүрийн Пүрэв гаригт хийдэг 4:11 мэдээллийн цагаараа инфляц 13 хувьд хүрсэн, шатахууны хомсдол нүүрлэсэн зэрэг нь Засгийн газраас хэрэгжүүлсэн бодлого алдаатай байсантай холбоотой гэж үзэн, УИХ-ын чуулган зарлахад Ерөнхий сайдыг огцруулах саналаа УИХ дахь Ардчилсан намын бүлгээс тавих болно гэж мэдэгдлээ.

Ардчилсан намын дэд дарга Н.ГАНИБАЛ:

-Яагаад өнөөдөр шатахуун хомсдов, яагаад үнийн огцом өсөлт бий болов. Засгийн газрын алдаатай буруу бодлого.  Шатахууны 45 хоногийн нөөцөө яаж зөв зарцуулах вэ гэдэг бодлого тооцоо гаргадаг салбарын яам, салбарын сайд нь буруу тооцоо гаргасан нь өнөөдрийн нөхцөл байдалд оруулчихлаа. Наадмын дараа 10 хоног амарсан. Засгийн газар нь ард иргэдээ яв, хотоо чөлөөл, шатахуун хангалттай хүрэлцэнэ гэдэг марзан мэдэгдэл хийсэн.  Автомашинаар 500 км явахад нэг машин 14 хоногийн нөөцийг хэрэглэнэ. 1000 –аас дээш км явахад нэг сар хэрэглэх шатахуун зарцуулна гэсэн үг.  Шатахуунаа тасалдуулахгүй  байх боломж байсан уу гэвэл байсан.

Засгийн газрын сайд нар онгоц хөлөглөөд наадам хэссэн. Ард иргэдээ наадам хэсээд бай гэдэг уриалгыг сайд Г.Дамдинням нь хийсэн. Үүний үр дүнд шатахууны тасалдал бий болсон, үнэ нь өссөн.

Магадгүй энэ нь Засгийн газар шатахууны үнийг өсгөх гэсэн бодлого байсан юм болов уу гэдэг хардлага төрж байгаа.

Энгийн математик аргачлалаар шатахууны нөөцийн тооцоогоо хийсэн бол өнөөдөр ийм хүнд байдалд орохгүй байсан болов уу.

Монголын төр өнөөдөр сүртэй, хүчтэй рийл хийсэн сүр Данзан даргатай боллоо. Ард нь ард түмний амьдрал доройтож байна. Нэг хүүхдийн хичээлийн хэрэгсэл бэлдэхэд дор хаяж  500 мянган төгрөгийн зардал гарч байна. Үүнийг хэрэглээний зээл авч шийдэж байна. Цалин нь өрхийн орлогод нь хүрэхгүй байгаа учраас зээл хэрэгцээ боллоо. Төрийн бодлого буруу байна, нэг сайдын марзан ярианаас болоод элгээрээ хэвтэж байна.

Хөдөөд малчид гүний худгаас малаа услах бензингүй болсон. Амралтаараа хөдөө очсон хүмүүс колонкийг нь хоосолсон.  Одоо хүүхдээ сургуульд хүргэж өгье гэхэд мотоцикльдоо хийх бензингүй болсон.

Монголбанк долдугаар сард инфляц 13 хувь боллоо гээд бодлогын хүүгээ өсгөсөн. Бодлогын хүүгийн өсөлт наймдугаар сард нөлөөлнө.  Ийм ч учраас УИХ дахь Ардчилсан намын бүлгийн гишүүд Н.Учралын Засгийн газрыг огцруулахаар санал нэгдсэн.  Нэг сайдын гаргасан алдаа Монгол Улсын бүх хүний зовлон болж байна. Дээрээс нь Засгийн газарт ажиллах чадамж алга.

Энэ Засгийн газарт байгаа энэ олон салбарын сайд хэрэггүй, тэвчиж болох зардлыг хасах зохицуулалтыг 2026 оны төсвийн тодотголоор оруулж ирж чадсангүй.

Монголбанкны зарласнаар төсвийн алдагдал 2.4 их наяд боллоо гэж байна. 2026 оны төсвийг анхнаасаа алдагдалтай баталсан. Дээрээс нь инфляцийн нөлөөгөөр төсвийн алдагдал улам өсч байна. Манай дарга нар ард түмэндээ үнэнээ хэлдэг болмоор байна, үнэнээ хэлээд ард иргэдтэйгээ нийлээд шийдлээ гаргадаг болмоор байна. Бүх шатахуунаа дуусгачихаад одоо татан авалт болохгүй байна гэж яриад нефть импортлогч компаниа буруутгаж байгаа.

Зарим нэг нефть импортлогч компани хэт даварсан, Монгол төрийн бодлогын дээр гараад асуудлаа Засгийн газарт тулгадаг байдал ч анзаарагдаж байна. Энэ бүхэн Засгийн бодлого буруу байна гэдгийг л харуулж байна.

-УИХ дахь МАН-ын бүлэг өнгөрсөн Даваа гаригт ээлжит бусаар хуралдаад Засгийн газрыг тогтвортой ажиллуулах ёстой гэдэг зарчмын шийдэлд хүрсэн, 68-уулаа дэмжсэн гэдэг мэдээлэл гарсан. Тэгэхээр танай бүлгээс Ерөнхий сайдыг огцруулах санал гаргаад нэмэргүй юм биш үү?

-Албан ёсны мэдээлэл биш байх. Ардын намд ч, Ардчилсан намд ч  эх орныхоо төлөө,  зөв бодлогын төлөө явдаг улстөрчид байгаа. Тэр хүмүүс бол энэ Засгийн газар ажиллаж чадахгүй байгаа гэдгээ ярих байх.  Чуулганаар манай бүлэг Засгийн газрыг огцруулах асуудлыг өргөн барина, тэр үеэр хэлэлцүүлгүүд явна. Ер нь Монгол Улсаа зөв болгоё, зөв бодлого хэрэгжүүлдэг Засгийн газартай болъё гэж байгаа улстөрчид нийлээд Засгийн газраа огцруулах байх гэж бодож байна.

Г.ХОРОЛ