Дэлхийн аялал жуулчлалын байгууллагаас гаргасан 2026 оны эхний хагас жилийн мэдээллээр Монгол Улс олон улсын аялал жуулчлалын зарцуулалтын өсөлтөөр Ази, Номхон далайн бүс нутгийн орнуудын дунд өндөр үзүүлэлттэй байна. Тодруулбал, олон улсын аялал жуулчлалын зарцуулалтын үзүүлэлтээр хамгийн сайн байгаа зах зээлийн номинацид Монгол Улс  29 хувийн өсөлттэйгөөр хоёрдугаарт эрэмбэлэгджээ.

Тус үзүүлэлтийг Япон Улс 38 хувийн өсөлтөөр тэргүүлсэн бол Монгол Улсын дараа Мексик 24, Бразил 22, Серби 18, Румын 17 хувийн өсөлттэй гарсан байна.

Зарцуулалтын өсөлтөөр эхний 15-д багтсан бусад орнуудаас Чили болон Словени тус бүр есөн хувийн, Латви долоон хувийн, АНУ болон БНСУ тус бүр зургаан хувийн өсөлттэй байжээ. Харин Дани, Пакистан, Герман тус бүр хоёр хувь, Франц нэг хувийн өсөлттэй байна.

Ингэснээр Монгол Улсын хувьд олон улсын жуулчдын аяллын үеэр хийсэн зарцуулалт өмнөх оны мөн үеэс 29 хувиар нэмэгдсэн үзүүлэлтээр дэлхийн тэргүүлэх орнуудын эгнээнд оржээ.

Мөн Соёл, спорт, аялал жуулчлал, залуучуудын яамны мэдээлэлд дурдсанаар Монгол Улс аялал жуулчлалын салбарын хэд хэдэн үзүүлэлтээр өндөр өсөлт үзүүлж байна. Тухайлбал, Ази, Номхон далайн бүс нутгийн хамгийн сайн үзүүлэлттэй улс орнуудын жагсаалтад 39 хувийн өсөлттэйгээр дөрөвдүгээрт, орлогын үзүүлэлтээр 27 хувийн өсөлттэйгээр гуравдугаарт эрэмбэлэгдэж байгаа аж.

Мөн дэлхийн хамгийн өндөр үзүүлэлттэй 20 улсын жагсаалтад Монгол Улс 39 хувийн өсөлттэйгээр дөрөвдүгээр байрт эрэмбэлэгдэж байна.

Ийнхүү 2026 оны эхний хагас жилийн байдлаар Монгол Улс аялал жуулчлалын салбарын жуулчдын тоо, зарцуулалт болон орлогын өсөлтийн үзүүлэлтээр олон улсын хэмжээнд өндөр байр суурь эзэлж байна. Өнөөдрийн байдлаар Монгол Улсад 2026 онд 646.999 гадаад жуулчин ирээд байна. Тэр дундаа ОХУ, БНСУ, БНХАУ-аас хамгийн олон жуулчин зорин ирж байгааг тоон үзүүлэлтүүд харуулж байгаа юм.

С.УЧРАЛ