Хурлын үеэр хотын дарга асан Э.Бат-Үүл ярихдаа "Өнгөрсөн 30 жилд хийж, хэрэгжүүлж, ард түмэнд үр өгөөжөө өгсөн бүх ажлыг Ардчилсан намаас хийсэн байдаг. Тэгсэн мөртлөө УИХ-ын сонгуульд МАН ялалт байгуулчихдаг. Яагаад МАН сонгуульд ялаад байна вэ. Тэгэхээр О.Цогтгэрэл даргын хэлдгээр "Бид өөрсдийн чаддаггүй улс төр рүү орсон байна. Өөрөөр хэлбэл, бид ордны улстөрчид биш. Ард түмнийхээ төлөө нэгдэж, цуглаж, жагсч явсан улстөрчид нэг мэдсэн чинь Төрийн ордонд янз бүрийн найраа хийдэг болсон. Тийм учраас бид олон түмэн рүүгээ эргэж явна. Маш их бухимдаж, учраа олохгүй байгаа ард түмэн рүүгээ очно. Бид ард түмэнтэйгээ цуг байсан улс төрийг авч ирж, намраас эхлүүлж хийнэ. Одоо сонгогчдын уулзалт хийхээ боль. Шууд тэмцлийн цуглаан хийе. Ардчилсан намын дарга О.Цогтгэрэл олон түмэнтэйгээ гагнагдаж ажиллаж чадах эсэхийг их зүйл хамаарна. О.Цогтгэрэл олон түмний лидер болж чадвал Ардчилсан нам ялна. Энэ бол намын даргын манлайлал маш чухал" гэв.

Ардчилсан намын Дарга О.Цогтгэрэл хөдөлгөөнийг нээж хэлсэн үгэндээ өнөөгийн Монгол Улсад засч, өөрчлөх шаардлагатай олон асуудал хуримтлагдсаныг онцлов. “Өнөөдрийн Монгол залуус, ахмадуудын хүссэн Монгол биш болжээ. Бидэнд засч, өөрчлөх ёстой олон зүйл байна. Ахмадууд тэтгэвэрт гараад ядуусын эгнээнд шилждэг тогтолцоог өөрчилнө. Эр цэрэгт мордсон хөвгүүд ээждээ эргэж очдоггүй болсон эмгэнэлт явдлыг таслан зогсооно. Бизнес эрхлэгчдээ дарамталдаг өндөр татвар, зээлийн хүүгийн мөлжлөгийг өөрчилнө. Энэ өөрчлөлтийг Ардчилсан намын манлайллаар, ард түмэнтэйгээ хамт хийнэ. Бидний зорьж буй өөрчлөлтийн зүг чиг бол “Бүтээдэг Монгол”. Бүтээдэг улс, бүтээдэг үндэстэн болохын тулд шаардлагатай дэд бүтэц, орчин нөхцөлийг та бид хамтдаа бий болгоно. Энэ бол монголчуудын хүсэл, тэмүүллээс урган гарсан өөрчлөлт. Энэ бол Ардчилсан хувьсгалын дараагийн давлагаа, бидний хийх үйл хэрэг, бидний үзэл санаа юм. “Өөрчлөе, бүтээе” үндэсний хөдөлгөөн бол ардчиллын дараагийн давалгаа. Үүнийг манлайлан хийх түүхийн даалгавар, ирээдүйн боломж та бидний өмнө байна” хэмээн онцоллоо. “Өөрчлөе, бүтээе” үндэсний хөдөлгөөнөөр дамжуулан Ардчилсан нам иргэдийн дуу хоолойг бодлого боловсруулах үйл явцын төвд авчирч, асуудлыг иргэдтэйгээ хамт сонсож, хамт оношилж, хамт шийдэж, бүтээдэг Монголын төлөөх бодит өөрчлөлтийг эхлүүлэх зорилт тавьж байна.