ОХУ сүүлийн халдлагаараа Украины нийслэл дэх нэн чухал дэд бүтцүүд рүү санаатайгаар халдсан гэж Киев хотын дарга Виталий Кличко хэлэв. Сүүлийн саруудад байгаагүй энэхүү томоохон халдлагад өртөж дор хаяж 17 хүн нас барсан бол 40 гаруй хүн гэмтэж бэртээд байна. Украины Онцгой байдлын албаны мэдээлснээр, агуулахууд, орон сууцууд, хүүхдийн эмнэлэг, сургууль халдлагад өртжээ.

Дэд бүтцүүдэд учирсан гэмтэл хохирлыг засахаар мэргэжилтнүүд ажиллаж байгаа бөгөөд ойрын өдрүүдэд халуун усны хангамж тасалдаж магадгүйг хотын дарга анхааруулсан байна.

Үүний зэрэгцээ Украинд агаарын довтолгооноос хамгаалах систем дутагдалтай байгааг Кличко дахин сануулаад, түншүүдийн зүгээс илүү их тусламж хэрэгтэй байгааг хэлэв. Ерөнхийлөгч Зеленский ч "Украинд баллистик пуужин эсэргүүцэх систем хангалтгүй хэвээр байвал ОХУ энх тайвны талаар нухацтай бодохгүй. ‘Patriot’ агаарын довтолгооноос хамгаалах системийн нөөцийг одоогоор нөхөж амжаагүй байна. Гэтэл бидэнд энэ нь өдөр бүр хэрэг болж байна. Нэмэлтээр ирэх пуужин бүр украинчуудын амийг аварна" гэжээ.

Украины арми АНУ-аас нийлүүлдэг "Patriot" пуужингаас ихээхэн хамааралтай байдаг. Гэсэн ч АНУ-ын нөөцийн дийлэнх нь Ираны дайнд шавхагдаад буй билээ.

Оросын сүүлийн цохилтоос болж олон мянган байшин тог цахилгаангүй болжээ. Мөн наймдугаар сарын 21-ний Баасан гаригийг амь үрэгдэгсдийн араас гашуудах өдөр болгон зарласан байна.