Хичээлийн шинэ жил ойртож байгаа тул Боловсролын сайд Л.Энх-Амгалан дараах мэдээллийг өглөө. Тэрбээр "Цэцэрлэг, сургууль хичээлээ есдүгээр сарын 1-ндээ эхэлнэ. Зөвхөн хотын төвийн 70 сургууль, 60 цэцэрлэгийн бүртгэл, бэлтгэл ажлууд цахимаар явагдана. Нийслэлийн бүх сургууль, цэцэрлэгийн захирал, эрхлэгч нарт өчигдөр өглөө зохицуулалтын талаар дэлгэрэнгүй мэдээлэл өгсөн. COP 17-ийн арга хэмжээ зохион байгуулагдах бүсийн цэцэрлэг, сургууль ч  есдүгээр сарын 1-ндээ хичээл эхэлнэ.

Мэргэжлийн боловсролын сургууль, политехникийн коллеж, их сургууль, коллежийн танхимын хичээл есдүгээр сарын 14-нөөс эхэлнэ. Иймд орон нутгаас хотыг зорих оюутан залуусыг есдүгээр сарын 1-нээс хойш ирэхийг зөвлөж байна” гэлээ.

Сануулахад, Улаанбаатар хотын хэмжээнд цэцэрлэгийн хүүхдийн цахим бүртгэл наймдугаар сарын 10-наас эхэлсэн бөгөөд 23-нийг өдрийг хүртэлх хугацаанд E-mongolia платформоор хүлээн авч эхэлсэн. Харин маргааш нэгдүгээр ангид элсэн суралцах сурагчдын бүртгэл албан ёсоор эхлэх юм. Бүртгэлийг E-mongolia платформоор зохион байгуулна. Их дээд сургуульд мөн элсэлтийн бүртгэлээ маргаашаас цахимаар эхлүүлнэ.