Орос, Украины талууд сүүлийн хэдэн долоо хоногт Хар тэнгис дэх арилжааны хөлөг онгоцнуудын эсрэг халдлагаа эрчимжүүлсэн. Үүнээс болж дэлхийн үр тарианы үнэ өсөөд буй. Иймд Туркийн Гадаад хэргийн сайд Хакан Фидан хэвлэлээр мэдэгдэл хийж, Хар тэнгис дэх цэргийн ажиллагааг хориглох саналыг хоёр талд тавьсан юм.

Тэгвэл ОХУ энэ саналаас татгалзаж байна. Тодруулбал, Украинд түр зуурын завсарлага олгох хагас дутуу арга хэмжээ авах шаардлагагүй гэсэн тайлбарыг Оросын Гадаад хэргийн яамны хэвлэлийн төлөөлөгч Мария Захарова өгчээ. Тус улс Украиныг далайн тээврийн эсрэг идэвхгүй террорист үйлдэл хийсэн гэж буруутгаж байна.

"Бид Украины халдлагыг Хар тэнгис дэх иргэний тээвэрлэлтийг тогтворгүйжүүлэх, хурцадмал байдлыг улам дэврээх, мөргөлдөөнийг сунжруулах зорилготой үйлдлэл гэж үзэж байна. Энэ бүх халдлага нь бүс нутгийн хөршүүдийн илэрхий зөвшөөрлөөр хийгдэж байгаа. Үүний зэрэгцээ бид нөхцөл байдал сайжирч байгаа шинж тэмдэг олж харахгүй байна. Тэгэхээр Украины дэглэмд түр зуурын амьсгалах орон зай олгох хагас хугас арга хэмжээ авах нь үндэслэлгүй юм" гэж Мария Захарова хэлжээ.

Түүнчлэн Турк болон НҮБ-ын зуучлалаар хэрэгжүүлсэн Хар тэнгисээр үр тариа тээвэрлэх санаачилгад ОХУ эргэн нэгдэх бодолгүй байгааг Захарова хэллээ. Энэхүү зохицуулалт нь томоохон экспортлогчдод Хар тэнгисээр үр тариагаа аюулгүй тээвэрлэх боломжийг олгосон юм.