Ховд аймгийн Буянт сумын Норжинхайрхан багийн нутагт оршин суух 10 настай А охин ор сураггүй алга болоод 11 хонож байна. Одоогоор түүнийг эрэн хайх, хэргийн шалтгаан нөхцөлийг тогтоох ажиллагаа тус суманд үргэлжилж байна.

Хэрэг явдлыг эргэн сануулбал, наймдугаар сарын 1-ний 09:00 цагийн орчимд охин хөрш айлынхаа ногооны талбай явах гэж байсан хүмүүсийг "Дагаж явъя" гэсэн ч тэд "Халуунд ядарна" гэж машинаас нь буулган үлдээжээ. Түүнээс хойш охин сураг тасарсан тул ар гэрийнхэн нь наймдугаар сарын 2-ны 20:40 цагт дуудлага өгсөн.  Дуудлага бүртгэгдсэнээс хойш Цагдаагийн байгууллагаас хоёр удаа 9 ба 6 хүний бүрэлдэхүүнтэй тусгай ажлын хэсэг томилон хэрэг гарсан газарт ажиллуулсан.

Албаны эх сурвалжийн мэдээлж буйгаар, цагдаагийн байгууллагаас охины алга болсон хэрэгт холбогдуулан ойр тойрны зарим хүмүүсийг сэжигтнээр татан мөрдөн шалгах ажиллагааг үргэлжлүүлж байгаа юм.

Мөн эрэн хайх ажиллагаанд Ховд аймгийн Онцгой байдлын газрын Эрэн хайх, аврах салбар, ОБГ-ын 48 дугаар анги, Зэвсэгт хүчний 123 дугаар анги, Аймгийн Цагдаагийн газар, Буянт сумын Цагдаагийн хэсэг, Аймгийн Шүүх шинжилгээний газар, Сумын Мэргэжлийн анги болон ар гэрийнхэн нэгдэн ажиллаж байна.

Албаныхан болон орон нутгийн иргэдээс бүрдсэн нийт 78 хүн, хоёр морь,  хоёр мотоцикл, есэн автомашинтайгаар эрэл хайгуул хийж байгаа хэдий ч одоогоор тодорхой сураг гараагүй байна.

Эрэн хайх ажиллагаа 11 дэх өдөр рүүгээ орж байгаатай холбогдуулан Буянт сумын Шуурхай штабаас олон нийтэд хандан уриалга гаргалаа. Эрэл хайгуулын бүсийг тэлэх, эрчмийг нэмэгдүүлэх зорилгоор сумын нийт иргэд, залуус, сайн дурынхныг уг ажилд биечлэн болон биечлэн тус дэм болохыг хүссэн юм. Сайн дураар оролцох иргэдийг Сумын Шуурхай штабын байранд ирж бүртгүүлэхийг урьсан бөгөөд биечлэн оролцох боломжгүй иргэдийг өөрсдийн хашаа, саравч, агуулах, худаг болон ойр орчмынхоо эзэнгүй, сэжигтэй газруудыг сайтар нягтлан шалгаж туслахыг хичээнгүйлэн хүсжээ.