Ирэх өвлийн галлагаанд зориулж 280 мянган тонн хагас коксон түлш худалдан авах тендерийг 288.7 тэрбум төгрөгийн төсөвт өртгөөр зарлаж, БНХАУ-ын компанид гэрээ байгуулах эрх олгожээ.

Тодруулбал, "Таван толгой түлш” ХХК-ийн зарласан тендерийн төсөвт өртөг 288 тэрбум 780 сая 676 мянган төгрөг. Тендерт дөрвөн компани үнийн санал ирүүлснээс БНХАУ-ын "Shaanxi Coal Chemical Industry Group Shenmu Energy Developments Ltd Wuzhou Branch" 288 тэрбум 386 сая төгрөгийн санал гаргаж, шалгарсан байна. Тус компанид энэ сарын 11-нд гэрээ байгуулах эрх олгожээ.

Харин бусад гурван компанийн санал шаардлага хангаагүй байна. Тухайлбал, Шэньмү хотын Жянтай Нүүрс-хими ХХК 285 тэрбум 780 сая төгрөг, “Цуй шинь девелопмент” 255 тэрбум 225 сая төгрөг, “И пэн хуй мэнг хэ девелопмент” 270 тэрбум 631 сая төгрөгийн үнийн санал тус тус ирүүлжээ.

Сонирхолтой нь, хамгийн бага буюу 255.2 тэрбум төгрөгийн үнийн санал ирүүлсэн “Цуй шинь девелопмент” ч тендерт шалгараагүй байна. Тендерийн үнэлгээгээр шаардлага хангаагүй гэж үзсэн бөгөөд шалгаруулалтаас хасахдаа Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн холбогдох заалтыг үндэслэжээ.

Ийнхүү нийслэл ирэх өвөл хэрэглэх хагас коксон түлшний хэрэгцээг хангахын тулд дахин 280 гаруй тэрбум төгрөгийн бүтээгдэхүүнийг гадаадаас худалдан авах нөхцөл бүрджээ. Энэ нь сүүлийн жилүүдэд утааг бууруулах зорилгоор шахмал түлшний технологийг өөрчилж, хагас коксон түлш ашиглах болсон бодлогын үргэлжлэл юм.

Жил бүр 200-300 тэрбум төгрөгөөр өвлийн түлшээ импортоор худалдан авч буй энэ нөхцөл байдлаас гарахын тулд дотооддоо “Нүүрсний пиролизын үйлдвэр” байгуулахаар төлөвлөж байгаа. Уг үйлдвэр ашиглалтад орсноор хагас коксон түлшний хэрэгцээг дотооддоо хангах боломж бүрдэнэ гэж тооцож байгаа ч төслийн хэрэгжилт удаашралтай байгааг НИТХ-ын зарим төлөөлөгч шүүмжилж байсан юм.

Энэ удаагийн тендерээр шалгарсан компанитай гэрээ байгуулж, түлшийг хугацаанд нь нийлүүлсэн тохиолдолд ирэх өвлийн хэрэгцээг хангах юм. Харин урт хугацаандаа нүүрсний пиролизын үйлдвэрийн төсөл хэзээ хэрэгжиж, Улаанбаатар жил бүр хэдэн зуун тэрбум төгрөгөөр түлш импортолдог байдлаас гарах вэ гэдэг нь тодорхойгүй хэвээр байна.