Өчигдрөөс эхлэн шатахууны дараалал эрс нэмэгдэж, иргэдэд хүндрэл үүсээд байна. Шатахууны нийлүүлэлт хэзээнээс хэвийн болох талаар Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэвээс тодрууллаа.

Тэрбээр "Саяхан Ангарскийн нефть боловсруулах үйлдвэрт технологийн алдаа гарч, ачилт хоёр хоног саарсан асуудал бий. Үүнээс шалтгаалж тодорхой хэмжээнд нийлүүлэлт багассан. Гэхдээ одоо ачилт хэвийн үргэлжилж байна. Наймдугаар сард бид энгийн АИ-92 автобензинээс 50 мянган тонныг авахаар баталгаажуулсан бөгөөд нийлүүлэлт тасралтгүй үргэлжилж байгаа. Гэхдээ баталгаажуулсан хэмжээ харьцангуй бага байсан, дээрээс нь сүүлийн хоёр хоногийн нийлүүлэлт тодорхой хэмжээнд буурсантай холбоотойгоор өнөөгийн нөхцөл байдал үүссэн.

Мөн Аж үйлдвэр, эрдэс баялгийн сайд Г.Дамдинням ажиллаж, нэмэлтээр 25 мянган тонн автобензин авахаар болсон. Ингэснээр энгийн АИ-92 бензиний наймдугаар сарын нийт баталгаажсан хэмжээ 75 мянган тонн болж байна. Евро-5 стандартын АИ-92 бензиний хувьд 15 мянган тонн бүтээгдэхүүн баталгаажсан. Үүн дээр БНХАУ-аас дахин 6 мянган тонн Евро-5 төрлийн бүтээгдэхүүн авахаар баталгаажуулж, эхний ачилтыг хийж эхэлсэн.

Тиймээс наймдугаар сард шатахууны бодит хомсдол үүсэх нөхцөл байхгүй. Маргаашийн дотор ачилтын хэмжээ нэмэгдэж, бүтээгдэхүүн орж ирвэл энэ долоо хоногийн сүүл гэхэд түгээлт тогтворжиж, нөхцөл байдал хэвийн болно гэсэн тооцоотой ажиллаж байна. Цаашид бусад эх үүсвэрээс шатахууны хэмжээг нэмэгдүүлэх чиглэлээр ч ажил тасралтгүй үргэлжилж байгаа. Олон улсын түвшинд хэлэлцээрүүд амжилттай явагдаж байна. Тиймээс наймдугаар сарыг баталгаажсан нөөцөөр асуудалгүй давж, есдүгээр сараас нийлүүлэлтийн эх үүсвэрүүд бүрэн тодорхой болж, хэвийн үргэлжлэх боломжтой гэж үзэж байна.

Онгоцны түлшний нөөц мөн харьцангуй багассан. Үүнтэй холбоотойгоор БНХАУ-аас 3 мянган тонн онгоцны түлш татан авахаар гэрээ, хэлцэл хийж эхэлсэн. Эхний 1000 тонн нь Монголд орж ирсэн бөгөөд үлдсэн 2000 тонн нь ачигдаж, нааш ирж байна. Мөн ОХУ-аас бүтээгдэхүүн орж ирэхгүй байгаатай холбоотойгоор Г.Дамдинням сайд ажиллаж, цаашид сар бүр 5 мянган тонн онгоцны түлш авахаар болсон.

Монгол Улсын онгоцны түлшний хэрэглээ харьцангуй бага. Тиймээс БНХАУ болон ОХУ-аас авахаар хийсэн дээрх хэлцлүүд хэрэгжсэнээр онгоцны түлшний нийлүүлэлтэд цаашид ямар нэгэн доголдол үүсэхгүй, хэвийн үргэлжлүүлэх боломж бүрдсэн гэж үзэж байна“ гэлээ.