Шатахууны нийлүүлэлт, түгээлт, дараалалтай холбоотой асуудлаар ажлын хэсгээс өнөөдөр /2026.08.10/ ээлжит  мэдээллээ хийлээ.

Ашигт малтмал газрын тосны газрын Газрын тосны бүтээгдэхүүний хэлтсийн дарга Д.Даваабаяр:

-Наймдугаар сард ОХУ-ын Роснефть компаниас 49.500 тонн АИ-92 автобензин, бусад нийлүүлэгчдээс 12500 тонн,  БНХАУ-аас 6000 тонн нийт 60 мянган тонн АИ-92 бензин худалдан авах захиалга өгсөн. Гадаад захиалга баталгаажин ачилтууд эхэлсэн. ОХУ-аас автобензин, түлш шатахуун АИ-92 тасралтгүй орж ирж байна.

Наймдугаар сарын 1-10-ны өдрүүдэд Сүхбаатар боомтоор АИ-92 автобензин орж ирсэн байна. Сүүлийн хоёр хоногт 84 вагон АИ-92 автобензин 5050 тонн ирсэн. Буулгаж авах ажлыг хийж байна. Наймдугаар сарын 10-ны байдлаар Толгойт өртөөнд 22, Рашаант өртөөнд 12, Эрдэнэт, Дарханд 10 вагон нийтдээ 44 вагон шатахуун буулгахаар ажиллаж байна.

Сүхбаатар боомтоор төмөр замаар тээвэрлэгдэн орж ирсэн АИ-92 автобензинийг Улаанбаатар төмөр зам, Гаалийн байгууллага, холбогдох байгууллага, аж ахуйн нэгжүүд хамтран  24 цагаар тасралтгүй ажиллаж, өртөөнүүдэд буулган, орон нутаг болон нийслэл рүү гаргах ажлыг гүйцэтгэж байна.

Дизель түлшний нийлүүлэлт тасралтгүй хангалттай хийгдэж байна. Улсын хэмжээнд 20 гаруй хоногийн үлдэгдэл нөөцтэй байгаа. Хадлан тариалангийн үеэр дизель түлш 10 мянган тонноор л  нэмэгддэг. Тухайн үед нь шийдвэрлээд явах боломжтой.

Улаанбаатар хотод агуулахаас орон нутгийн зарим байршлууд руу түгээлт гаргадаг. Эрдэнэт, Дархан, Сайншанд, Чойр гэсэн өртөөнүүдэд төмөр замаар дамжуулан шатахууныг хүргэдэг  Эндээс аж ахуйн нэгжүүд орон нутгийнхаа сүлжээгээр бусад аймаг орон нутаг руу гаргадаг байгаа.

Гаалийн байгууллага болон Татварын байгууллагаас өгсөн мэдээллээр “ибаримт” дээр суурилсан шатахуун худалдан авалтын тоон мэдээлэл гаргасан.  Тухайлбал, нийт үйлчлүүлэгчийн 60 хувь нь 50 мянгаар шатахуун авчихаад дахин оочирлон нэмж 50 мянгаар бензин авсан мэдээллийг ирүүлсэн.

Монгол Улс дотооддоо боловсруулах үйлдвэр байхгүй тул бүх шатахуунаа импортоор хангадаг. Гол ханган нийлүүлэгч ОХУ –д дотоод нь нөхцөл байдал хүндрэлтэй байгаа хэдий ч сар бүр тодорхой хэмжээгээр АИ-92 автобензин,  дизель түлш нийлүүлж байгаа.

АИ-92 автобензиний хувьд Монгол Улс 50-60 мянган тонны сарын ердийн хэрэглээтэй.

Монгол Улс ОХУ, БНХАУ гэсэн хоёр хөрштэй. Бүх тээвэр ложистик маань энэ хоёр улсаар дамжиж хийгдэнэ. Тухайн улсын төмөр замын хуваарьтай нягт уялдах хэрэгтэй. БНСУ-тай тодорхой хэмжээний шатахуун авахаар хэлэлцэж зарчмын хувьд тохиролцоонд хүрсэн” гэв.

Улаанбаатар төмөр зам хувь нийлүүлсэн нийгэмлэг:

-Улаанбаатар төмөр зам нь улсын хойд болон урд хилээр орж ирж байгаа бензин, шатахуун дизелийн түлштэй вагонуудыг цаг тухайд нь тасралтгүй бүх өртөөнд хүргэж, хүлээн авагчдад олголт хийж байна.

Саяхан гарсан мэдээлэлд “хойд хил дээр маш их ачаатай олон вагонууд бөөгнөрсөн байна. Улаанбаатар төмөр зам нийгэмлэг татаж авч чадахгүй байна” гэсэн мэдээлэл гарсан нь ташаа юм. Тээвэртэй холбоотой мэдээллийг тээврийн үйл ажиллагаа эрхэлж байгаа Улаанбаатар төмөр зам нийгэмлэгээс авч байхыг хүсье.

Түлш шатахуунтай бүх вагонуудыг цаг тухайд нь хүлээн авагчид нь хүргэж өгч  ажиллаж байгаа. Цаашдаа ч энэ тээврийг бид тасралтгүй найдвартай үйл ажиллагаагаар хангаж ажиллана гэлээ.

С.УЧРАЛ