Энэ оны эхний долоон сарын байдлаар улсын хэмжээнд хүний эрүүл мэндийн эсрэг болон өмчлөх эрхийн эсрэг зарим төрлийн гэмт хэргийн гаралт өмнөх оны мөн үеэс буурсан байна.

Тухайлбал, хулгайлах гэмт хэрэг 2.3 хувь, залилах гэмт хэрэг 4.1 хувь, хүний эрүүл мэндэд хохирол санаатай учруулах гэмт хэрэг 5.4 хувь, дээрэмдэх гэмт хэрэг 7.9 хувиар тус тус буурчээ.

Цагдаагийн байгууллагаас иргэдийг гэмт хэрэг, зөрчлөөс урьдчилан сэргийлэх, эрсдэлтэй нөхцөл байдлыг шуурхай мэдээлэхийг анхааруулж байна.

Түүнчлэн Цагдаагийн ерөнхий газрын 2026 оны наймдугаар сарын 9-ний 102 дугаарт ирсэн хоногийн нөхцөл байдлын мэдээллээр нийт 2189 гомдол, мэдээлэл бүртгэгджээ. Үүнээс 902 нь зөрчил, 49 нь гэмт хэргийн шинжтэй дуудлага, мэдээлэл аж.

Мөн хоногийн хугацаанд 70 хүүхэд, гэр бүлийн хүчирхийллийн дуудлага, 67 согтуугаар тээврийн хэрэгсэл жолоодсон, долоон хулгайлах, таван залилах хэрэг бүртгэгджээ. Цагдаагийн алба хаагчид 102 иргэнийг эрүүлжүүлж, гэмт хэрэг, зөрчилтэй холбоотой найман этгээдийг нөхөн илрүүлсэн байна.

Эрүүгийн хуулийн 11.7 дугаар зүйлийн нэг дэх заалтад заасан гэр бүлийн хамаарал бүхий харилцаатай хүнийг байнга зодсон халдсан бол зургаан сараас нэг жил хүртэл хугацаагаар зорчих эрхийг хязгаарлах эсхүл хорих ял шийтгэнэ.

Аюулгүй амар тайван нийгэм бүтээхэд иргэн бүрийн оролцоо чухал. Иргэн та хууль, дүрэм, журмыг мөрдөх, эргэн  тойрондоо сонор сэрэмжтэй байх, гэмт хэрэг, зөрчил үйлдэгдэх эрсдэлтэй нөхцөл байдлын талаар Цагдаагийн байгууллагад шуурхай мэдэгдэж байгаарай.

С.УЧРАЛ