Цахилгаан дугуйны импорт 10 дахин өсөж, хоёр дугуйт тээврийн хэрэгслээс /цахилгаан моторт дугуй, мопед, суррон, скүүтерээс үүдэж/үүдэж бэртэж гэмтсэн иргэдийн тоо гурав дахин өсчээ

Тодруулбал, 2022 онд дээрх тээврийн хэрэгслүүдээс үүдэж 50 иргэн гэмтэж, бэртсэн бол 2023 онд 305 иргэн гэмтэж, бэртжээ. Тэгвэл 2024 онд 532 иргэн, 2025 онд цахилгаан моторт дугуй, мопед, суррон, скүүтерээс унаж, мөргүүлж 2820 иргэн бэртэж, гэмтсэн бол 2024 онд гурван хүн нас барсан байна.

Осол гэмтлийн шалтгаанаар нь авч үзвэл: Мопед, суррон, скүүтерээс үүдэж гэмтсэн нийт иргэдийн буюу 72 хувь нь онхолдож гэмтэж, бэртсэн, Мопед, суррон, скүүтертэй зорчигч автомашинд мөргүүлсэн тохиолдол 17.5 хувийг, явган зорчигч мопед, суррон, скүүтерт мөргүүлсэн тохиолдол 9 хувь, мопед, суррон, скүүтертэй зорчигчид хоорондоо мөргөлдсөн тохиолдол 1.5 хувийг эзэлж байгаа аж. Улмаар дийлэнх тохиолдолд, ослын үед толгой, тохой, шуу, өвдөг, шилбэ зэрэг эрхтэнүүд хугарч, гэмтдэг байна.

ЦАХИЛГААН ДУГУЙНЫ ИМПОРТ 10 ДАХИН НЭМЭГДСЭН БАЙНА

Тэгвэл эрэлтээ дагаад цахилгаан мотор, туслах хөдөлгүүрээр тоноглогдсон мопед, унадаг дугуйн импорт сүүлийн гурван жилд 10 дахин өсчээ. Тодруулбал, 2022 онд 1065 ширхгийг импортоор оруулж ирж байсан бол 2025 онд 12,693 ширхэгт хүрч, 3 жилийн хугацаанд цахилгаан дугуйны импорт 10 дахин өссөн үзүүлэлттэй байна. Үнийн дүн мөн 1.47 сая ам.доллараас 4.74 сая ам.доллар болж нэмэгджээ.

Сурроныг 18 насанд хүрсэн ангиллын жолоодох эрхийн А үнэмлэхтэй хүн жолоодоно, скүүтерийг техник үзүүлэлтээр нь мопедын ангилал руу оруулсан учраас 16-аас дээш насны хүүхдүүд унаж, замын хөдөлгөөнд оролцохоор болсон. Тодруулбал, насанд хүрээгүй хүүхдүүд мопед, скүүтер, суррон, цахилгаан дугуй унаж аваар осолд өртөх нь нэмэгдэж байгаатай холбоотойгоор 2026 оны дөрөвдүгээр сарын 10-наас хөдөлгөөнийг нээхдээ 16 нас хүрээгүй хүүхэд унахыг хязгаарласан. Мөн 18 нас хүрээгүй хүүхэд суррон унаж хөдөлгөөнд оролцвол Зөрчлийн тухай хуулиар 200 мянган төгрөгөөр торгох аж.

ХҮҮХДИЙН УНАДАГ СУРРОНЫ ДУНДАЖ ҮНЭ 6-15 САЯ ТӨГРӨГ

Суррон нь үндсэндээ хоёр төрөл буюу спорт, энгийн загвартай. Хурд хүч, батерей зэргээс шалтгаалж үнэ хэлбэлздэг байна.

Монголд өргөн хэрэглэж, хөдөлгөөнд оролцож байгаа загваруудын дундаж үнэ 6-15 сая төгрөгийн хооронд байдаг аж. Хурд, хүч, загвар, үзүүлэлт, үйлдвэрлэгдсэн он зэргээс хамаарч 16-24 сая төгрөгийн үнэтэй сурроны эрэлт ч их байдаг байна.

Мэдээж асран хамгаалагчид хүүхдүүдээ замын хөдөлгөөнд оролцуулах шийдвэр гаргаж байгаа тохиолдолд аль болох чанартай, дунджаас дээд үнэтэй сурроныг сонгодог аж. Гэвч энэ нь эргээд хүүхдээ ямар их эрсдэлд оруулж байгааг эцэг, эхчүүд анзаардаггүй. Насанд хүрээгүй, замын хөдөлгөөний дүрэм мэдэхгүй хүүхэд нь сургууль, гэрийнхээ хооронд суррон унаж зорчиж байгаа нь амиа алдах хүртэл аюултай. Харамсалтай нь, үүнийг насанд хүрэгчид ойлгодоггүй болохыг албаныхан хэлж байгаа юм. Өргөн хэрэглэгдэж байгаа дундаж үнэтэй загварыг дараах зургаас харна уу.

Цагт энгийн загвар нь 40 км, спорт нь 70 км хүртэл хурдална гэдэг анхаарах зүйл. Замын хөдөлгөөнд сурагчид өөрсдийн сурроноор гангарч, хичээлдээ орохдоо сургуулийнхаа дугуйн зогсоолд эгнүүлж тавьж байгаа нь нэг талаар энэ унаа гангараа болсныг илтгэж байна. Тэгвэл үүнд хэн хязгаарлалт тавих нь зүйтэй вэ? 

Мэдээж цагдаагийн алба хаагчид замын хөдөлгөөний дүрмийн дагуу хөдөлгөөнд оролцогчдод хяналт тавьж байгаа. Гэхдээ хамгийн чухал нь эцэг, эхчүүдийн хязгаарлалт.

Монголын зах зээлд өргөн хэрэглээтэй байгаа зарим загварыг онцолбол "Surron light bee X", "Surron ultra bee" зэрэг байна. Үнийн хувьд дундаж тооцогдож байгаа дээрх загваруудыг ерөнхий мэдээлэлтэй нь нэгтгэн зурагт харууллаа.