Иран улс Ормузын хоолойг бүрэн нээхийн өмнө АНУ зургаан нөхцөлийг биелүүлэх ёстой гэж мэдэгдлээ. Ираны Үндэсний аюулгүй байдлын дээд зөвлөлийн нарийн бичгийн дарга Мохаммад Багер Золгадр Бямба гаригт (2026.08.08) мэдэгдэхдээ, АНУ “зан төлөвөө засах” хүртэл Ормузын хоолой хаалттай хэвээр байна гэжээ.

Түүний мэдэгдсэнээрАНУ-д дараах шаардлагыг тавьж байна. Тодруулбал:

• АНУ Ираны эсрэг заналхийлэл, дарамт болон тус улсын үндэсний, шашны үнэт зүйлсийг доромжлох үйлдлээ зогсоох;
• Иран болон Ливан, Палестин, Йемен, Ирак дахь холбоотнуудын эсрэг халдлагаа бүрэн зогсоох;
• АНУ-ын тэнгисийн цэргийн бүслэлтийг цуцалж, Ираны ойролцоох тэнгисийн болон агаарын цэргийн хүчээ татах;
• Ираны эсрэг явуулсан гэх хоёр дайны улмаас учирсан хохирлыг нөхөн төлөх;
• АНУ-ын хориг арга хэмжээг цуцлах;
• Ираны царцаасан хөрөнгийг ямар нэгэн нөхцөлгүйгээр суллах.

Ираны Исламын хувьсгалт гвардийн корпус мөн Ормузын хоолойг нээх эсэх нь дээрх шаардлагыг АНУ хүлээн зөвшөөрөхөөс хамаарна гэж мэдэгджээ.

Ормузын хоолой нь дэлхийн газрын тосны худалдааны хамгийн чухал усан замуудын нэг бөгөөд Персийн булангаас дэлхийн зах зээлд газрын тос тээвэрлэх гол гарц юм.

Ираны шинэ шаардлагууд нь өмнөх удаагийн хэлэлцэж байсан нөхцөлөөс илүү өргөн хүрээтэй байна. Тухайлбал, АНУ-ын цэрэг хүчээ татах, хоригийг цуцлах, Ираны царцаасан хөрөнгийг суллах зэрэг асуудлыг Ормузын хоолойг нээхтэй шууд холбон тавьжээ.

Харин АНУ-ын байр суурь өөр байна. АНУ-ын нэгэн албан тушаалтны мэдээлснээр, Ормузын хоолойгоор худалдааны хөлөг онгоцууд ямар нэгэн саадгүй зорчих боломж бүрдвэл Ираны боомтуудын бүслэлтийг цуцлах боломжтой аж.

Үүний зэрэгцээ Ираны ерөнхийлөгч Масуд Пезешкиан АНУ-тай тохиролцоонд хүрэхийг дэмжиж, “Одоо тохиролцоонд хүрэх хамгийн тохиромжтой үе” гэж мэдэгджээ. Тэрбээр Иран болон АНУ өмнөх тохиролцоог зөрчсөн гэх маргааныг шийдвэрлэхийн тулд цэргийн мөргөлдөөн үүсгэхийн оронд яриа хэлэлцээгээр шийдвэрлэх механизм бий болгох шаардлагатай байсан гэж хэлсэн байна.

Одоогоор Иран, АНУ-ын хооронд Оман улс зуучлагчаар ажиллан, хэлэлцээнд хүргэхийг зорьж байгаа бөгөөд Тегеран “дайн ч биш, энх тайван ч биш” өнөөгийн байдлаас гарахыг хүсэж байгаагаа илэрхийлжээ.