Нийслэлийн Замын хөгжлийн газар /НЗХГ/-аас Улаанбаатар хотод хэрэгжүүлж буй зам засвар, шинэчлэлтийн нэгдсэн төлөвлөгөөний дагуу өнөөдрөөс эхлэн зарим байршилд авто замын хөдөлгөөнийг түр болон удаан хугацаагаар хэсэгчлэн хаахаар боллоо. Тухайлбал, Хан-Уул дүүргийн нутаг дэвсгэр, Туул гол дээрх Зайсангийн баруун талын гүүрний хучилтыг шинэчлэх ажил энэ сарын 07-ны 23:00 цагаас эхэлж, 10-ны өдрийн 06:00 цаг хүртэл үргэлжилнэ. Мөн Толгойтын авто замаас Ард Аюушийн өргөн чөлөө хүртэлх зам шинэчлэлтийн хүрээнд Ард Аюушийн өргөн чөлөөний өнгө хучилтын ажлыг гүйцэтгэх юм. Тус замын зорчих хэсгийг хэсэгчлэн хааж байгаа бөгөөд засварын ажил өнөөдрийн 07:00 цагаас эхлэн 09-ний өдрийн 00:00 цаг хүртэл үргэлжилнэ. Түүнчлэн Сонгинохайрхан дүүргийн Нэгдүгээр хорооллын арын замын шинэчлэлтийн хүрээнд өнөөдөр оройн 23:00 цагаас эхлэн маргааш өглөөний 06:00 цаг хүртэл хөдөлгөөнийг хязгаарлана.

Тодруулбал, тус дүүргийн 14-р хороо, Цамбагаравын уулзвараас 11 болон 12-р байрны чиглэлд борооны ус зайлуулах шугамын хөндлөн сэтэлгээ хийх тул зорчих хэсгийг бүрэн хаахаар төлөвлөжээ.

Иймд иргэд, жолооч та бүхэн дээрх байршлуудад хийгдэж буй зам засварын ажлыг хүндэтгэн үзэж, бусад боломжит замуудыг сонгон хөдөлгөөнд оролцохыг холбогдох албанаас анхааруулж байна.