БНХАУ-ын буцалтгүй тусламжаар барьсан "Ногоон нуур" 1008 айлын орон сууц 2025 оны аравдугаар сард ашиглалтад орсон. Түүнээс хойш есөн сар гаруйн хугацаа өнгөрсөн боловч тус орон сууцанд нэг ч өрх албан ёсоор нүүж ороогүй хэвээр байна. Шинэ орон сууц эзнээ хүлээж, харин гэр хорооллын иргэд газар чөлөөлөлт, дахин төлөвлөлтийн шийдвэрээ хүлээсээр байгаа нь төслийн хэрэгжилт яагаад ийнхүү удаашрав гэсэн асуултыг дагуулж байна. Төсөл хэрэгжиж эхлэх үед олон нийт энэхүү орон сууцыг төрийн орон сууцны бодлогын хүрээнд иргэдэд худалдах, түрээслэх эсвэл түрээслээд өмчлөх хэлбэрээр ашиглана гэсэн хүлээлттэй байсан. Харин Хот байгуулалт, барилга, орон сууцжуулалтын яам уг орон сууцыг худалдаалахгүй, түрээсийн зориулалтаар ашиглахгүй гэдгийг албан ёсоор мэдэгдсэн.

Үүний оронд хотхоныг гэр хорооллын дахин төлөвлөлтийн хүрээнд газраа орон сууцаар солих иргэдийг байрлуулахад ашиглахаар шийдвэрлэсэн билээ. Тодруулбал, нийт 1008 айлын 756-г газраа орон сууцаар солих иргэдэд, үлдсэн 252-г дахин төлөвлөлтийн хугацаанд түр суурьшуулах зориулалтаар ашиглахаар төлөвлөсөн. Өөрөөр хэлбэл, энгийн иргэдэд худалдах, түрээслэх, түрээслээд өмчлөх боломж энэ төсөлд байхгүй болсон гэсэн үг. Тиймээс гол асуудал нь хэнийг байрлуулах вэ гэдэгт бус, ашиглалтад орсон орон сууц олон сарын турш хоосон хэвээр байгаа явдал юм.

Улсын комисс барилгыг хүлээн авснаас хойш газрын үнэлгээ бүрэн дуусаагүй, хамрагдах өрхүүдийг эцэслэн тодорхойлоогүй, иргэд ч байрдаа нүүж эхлээгүй байна.

Хот байгуулалт, барилга, орон сууцжуулалтын сайд Э.Бат-Амгалангийн мэдээлснээр "Ногоон нуур"-ын орон сууцыг инженерийн дэд бүтэц бүхий гэр хорооллын газар чөлөөлөлтөд ашиглах бөгөөд Дамбадаржаа, Шархад, Баянхошуу зэрэг байршилд газраа чөлөөлөх иргэдийг хамруулахаар судалж байгаа аж. Мөн газрын үнэлгээг зах зээлийн үнээс хямд үнэтэй төрийн орон сууцаар хийх бөгөөд нэг ам метрийн үнийг ойролцоогоор 4-4.2 сая төгрөгөөр тооцохоор ажиллаж байгаагаа мэдэгдсэн.

Гэр хорооллын дахин төлөвлөлтийг эрчимжүүлэх зорилгоор уг орон сууцыг ашиглах нь бодлогын хувьд зөв алхам гэж үзэж болно. Гэвч газрын үнэлгээ хийх, хамрагдах өрхүүдийг тодорхойлох, шаардлагатай зохицуулалтыг бүрдүүлэх ажил удааширснаар ашиглалтад орсон барилга эзнээ хүлээсэн хэвээр байна. Анхнаасаа энэ орон сууцыг газар чөлөөлөлтийн бодлогын хүрээнд ашиглахаар төлөвлөсөн бол барилгын ажилтай зэрэгцүүлэн шаардлагатай бэлтгэл ажлуудыг хангах боломжтой байв. Харин шийдвэр, зохион байгуулалтын ажил хойшилсноор бэлэн болсон орон сууцыг эзэнтэй болгох хугацаа сунжирсаар байна. Энэ хэрээр ашиглалтын зардал ч гарсаар байгаа юм.