Сүрьеэ нь өнөөдөр ч дэлхий нийтийн эрүүл мэндийн тулгамдсан асуудлын нэг хэвээр байна. Дэлхийн эрүүл мэндийн байгууллагын 2025 оны мэдээллээр, сүрьеэ нь дэлхий даяар хамгийн олон хүний амь насанд хүрдэг халдварт өвчний нэг бөгөөд эмчилгээ удаан үргэлжилдэг. Мөн халдварын эрсдэл өндөртэй тул эрүүл мэндийн салбарын хамгийн том сорилтын нэгт тооцогдож байна. Зөвхөн 2023 онд дэлхий дахинд 10.8 сая хүн сүрьеэгээр өвчилж, 1.25 сая хүн үүний улмаас нас баржээ. Түүнчлэн Монгол Улс сүрьеэгийн өвчлөл өндөр, олон эмэнд тэсвэртэй сүрьеэгийн дарамт ихтэй дэлхийн 30 орны нэг хэвээр байна. Ялангуяа 2023 онд эмчилгээний хамралт багатай, өвчлөлийн ачаалал өндөр дөрвөн улсын нэгээр нэрлэгдсэн байна.

Ийм нөхцөлд сүрьеэгийн тусламж, үйлчилгээний чанар, халдварын хяналтыг сайжруулах зорилгоор Халдварт өвчин судлалын үндэсний төвийн Сүрьеэгийн клиникийн Олон эмэнд тэсвэртэй сүрьеэгийн тасгийн засвар, механик агааржуулалтын системийн шинэчлэлийн ажил бүрэн дуусаж, ашиглалтад орууллаа.

Төслийн хүрээнд барилгын засварыг “Мөнх Хархираа” ХХК 424.447.466 сая төгрөгөөр, агааржуулалтын системийн шинэчлэлийг “Арвин-Өргөө” ХХК 500 сая төгрөгөөр тус тус чанарын өндөр түвшинд гүйцэтгэсэн байна.

Мөн худалдан авах ажиллагааны явцад хэмнэгдсэн хөрөнгийг үр ашигтай шийдвэрлэснээр, анхны зураг төсөлд тусгагдаагүй байсан ч тасгийн үйл ажиллагаанд зайлшгүй шаардлагатай нэмэлт засвар, тохижилтын ажлуудыг бүрэн хэрэгжүүлжээ.

Ингэснээр олон эмэнд тэсвэртэй сүрьеэтэй өвчтөн халдвар хяналтын олон улсын шаардлагад нийцсэн, аюулгүй, тав тухтай орчинд эмчилгээ, тусламж үйлчилгээ авах нөхцөл бүрджээ. Мөн эмнэлгийн ажилтнуудын хөдөлмөрийн аюулгүй байдал, тусламж үйлчилгээний чанарыг сайжруулахад чухал ахиц болохыг ХӨСҮТ онцоллоо. Цаашид тус төв Глобал сан болон олон улсын түнш байгууллагуудтай хамтын ажиллагаагаа үргэлжлүүлэн өргөжүүлж, сүрьеэгийн тусламж үйлчилгээний хүртээмж, чанарыг сайжруулах чиглэлээр ажиллах юм.