Үндэсний их баяр наадмын амралтын өдрүүдэд Улаанбаатар хотоос гарах хөдөлгөөн болон орон нутагт гарсан зам тээврийн ослын нөхцөл байдлын талаар ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн хошууч Г.Отгонтамираас тодрууллаа.

Тэрбээр, "Автотээврийн үндэсний төвөөс ирүүлсэн мэдээллээр баяр наадмын өдрүүдэд нийслэл хотоос 280 гаруй мянган тээврийн хэрэгсэл орон нутгийг чиглэн гарсан. Наадмын өдрүүдэд цагдаагийн байгууллагаас өндөржүүлсэн бэлэн байдлын зэрэгт шилжин ажиллаж, орон нутгийн замд цагийн менежментийн дагуу шугаман эргүүл, хяналт шалгалтыг зохион байгуулсан. Энэ жил цагдаагийн байгууллагаас улсын хэмжээнд зохион байгуулсан "Амраад, аюулгүй аялъя" аяны хүрээнд 240 орчим цэгт алба хаагчид хяналт шалгалт хийн ажилласан бөгөөд долоодугаар сарын 8-наас 19-ний өдрүүдэд нийт 18 мянга орчим зөрчлийг илрүүлж, таслан зогсоосон. Тодруулбал, согтууруулах ундааны зүйл хэрэглэсэн үедээ жолооны ард сууж хөдөлгөөнд оролцсон 660 жолоочийг улсын хэмжээнд илрүүллээ.

Мөн долоодугаар сарын 9-нөөс 18-ны хооронд зам тээврийн ослын 2,917 дуудлага мэдээлэл бүртгэгдсэнээс осол, хэргийн шинжтэй 1,855 тохиолдол байв. Орон нутгийн замд 73 осол бүртгэгдсэний улмаас 22 хүн амиа алдаж, 87 хүн эрүүл мэндээрээ хохирсон харамсалтай явдал гарсан" гэлээ.

Энэ жил баруун аймаг буюу Булган, Хөвсгөл, Архангай чиглэлийн замд хөдөлгөөний ачаалал хамгийн өндөр байсан бол Өмнөговь, Өвөрхангай, Төв аймгуудын нутаг дэвсгэрт зам тээврийн осол хамгийн их бүртгэгджээ. Ослын шалтгааныг дурдвал, хурд хэтрүүлэх, хориглосон нөхцөлд гүйцэж түрүүлэх, согтуугаар тээврийн хэрэгсэл жолоодох болон бүрэн бус тээврийн хэрэгсэлтэй хөдөлгөөнд оролцсон зэрэг шалтгаанууд голлон нөлөөлжээ.

Иймд иргэдийг амралтын өдрүүдэд хол замд аялахдаа болон буцахдаа замын хөдөлгөөний дүрмийг чанд баримтлан, ядарсан үедээ заавал амарч, аюулгүй байдлаа хангаж оролцохыг Тээврийн цагдаагийн албанаас анхаарууллаа.