Монголчууд сайхан наадлаа. Энэ жилийн наадам сайхан болж, олон хоног амарсан учраас дэлгэр наадамлаж, дэнж хотойлгов. Гэвч наадмын амралтаар, аймаг, сумын наадмаа зорьсон монголчуудад шатахуун импортлогчид, Г.Дамдиннямын зүгээс шатахууны үнийг 250 төгрөгөөр нэмж, сюрприз барив. Энэ сюрпризийг эхлэл нь наадмын өмнө байсан бөгөөд Петровис шатахууны үнээ 250 төгрөгөөр нэмж, шатахууны урт дараалал үүсгэж байсан нь тэд монголчуудаар сегадаж байсныг илтгэнэ. Угтаа бол шатахуун импортлогчид наадмын өмнө үнээ нэмэхээр үгсэн хуйвалдсан байсан ч улстөрчид нь түр хойшлуулаад наадмын үеэр гээд хэлчихсэн, тохирчихсон бололтой. Тиймээс л бүгдээрээ наадамлаж, хөдөөг зорьсных нь дараа импортлогчид үнээ нэмэв. Нэгэнт нийтээрээ хөдөө явчихсан, эргэж ирэх нь тодорхой хүмүүс хэдэн цагаар дугаарлаж, хүний өөрийн танил тал хайж, өндөр үнээр ч хамаагүй шатахуун аваад эргэж ирэх нь тодорхой ийм нөхцөлийг импортлогчид, Г.Дамдинням нар "тооцоолж" гэж л хардаж байна, монголчууд.

ОХУ-ын нөхцөл байдлаас шалтгаалж шатахууны нөөц, үнэ хоёр нэмэгдэх эрсдэл байсан уу, байсан. Гэхдээ салбарын сайд Г.Дамдинням бараг л өдөр бүр ОХУ-ыг зориод, уулзаад асуудлыг шийдэж байгаа гэж гоншигнож байв.

Нөөц хангалттай байхад үнэ нэмэгдэхгүй, хомсдол үүсэхгүй гэж бардамнаж байсан Г.Дамдинням үнэ нэмчихсэн, монголчууд шатахуунд дугаарлаж байхад ганц үг ган хийсэнгүй. Яамныхаа хэдэн мэргэжилтэнг чи гарч ярь гэж тушаачихаад, өөрөө наадамлаад алга болов.

Наадмын дараа намар гэдэг, монголчууд. Өвлийн бэлтгэл ажил, хичээл сургуулийн бэлтгэл гээд монголчууд урд хормойгоороо хойд хормойгоо нөхдөг л цаг үе. Яг л ийм цаг үеийг далимдуулаад, шатахуунд дугаарлаж байгаа, үнэ нэмсэн асуудлыг хэн ч ярихааргүй болтол нийгэмд "сенсаац" үүсгээд л наадмын өдрүүдийг давчихав. Гэхдээ хүн бүр урьдын адил, өдөр тутмын амьдралдаа орж эхлээд, шатахууны үнэ нэмэгдсэнээс үүдэх олон эрсдэлтэй тулж эхэлнэ. Шатахууны хомсдол үүсэхэд л өргөн хэрэглээний барааны үнэ, талхны үнэ, ширхэг бохины ч үнэ нэмэгдэж эхэлнэ. Угаасаа эдийн засгийн өгөөж нь өрх, гэрийн хаалгаар орж чадахгүй, зөвхөн сайд дарга нар л эдийн засаг өссөн сайхан тоо яриад байгаа болохоос бодит амьдрал дээр монголчуудын орлого нэмэгдээгүй эсрэгээрээ өргөн хэрэглээний барааны үнэ, махны үнэ гээд өсөөгүй юм бараг л үлдээгүй байсан нэмээд шатахуун 250 төгрөгөөр нэмэгдчихэд цаашид юу болох бол…

Нэгэнт үнээ баяр наадам далимдуулаад нэмчихсэн импортлогчид үнээ буулгахгүй, Г.Дамдинням ямар ч хариуцлага хүлээхгүй, харин монголчууд орлогогүй, зарим нь орлого багатай ч урд хормойгоороо хойд хормойгоо нөхсөөр намартай, өвөлтэй золгох нь. Г.Дамдинням сайдын суудлаасаа буугаад УИХ-ын гишүүний сэндийтээ үлдэж, импортлогчид төр хоорондоо бичиг цаас шидэлцээд л дуусна. Харин монголчууд хохироод л үлддэг ийм л жишгээр бид өнгөрсөн жилүүдийг, ирэх жилүүдийг ч үдэхээр л харагдаж, уншигдаж байна даа.