Сэлэнгэчүүдийг УИХ-д төлөөлж буй Ж.Энхбаяр сүүлийн үед багагүй дуулиан шуугиантай төр түшилцэж байна. Тэрбээр УИХ-ыг хоёр талцуулаад буй тамхины хяналтыг чангаруулах асуудалд нэг талыг барьсан шийдвэр гаргаж, хүүхэд өсвөр үеийнхний амны угж болоод буй цахилгааны тамхи буюу вэйпийн  бизнесийг дэмжсэн гэдэг цол зүүгээд амжсан. УИХ-ын гишүүн О.Номинчимэг түүнийг 2024 оноос хойш тасралтгүй сайд хийсэн хугацаандаа цахилгаан тамхины татвар, хураамжийг нэмэх шийдвэрээс удаа дараа хойш сууж, эс үйлдэхүйг угсруулан гаргасан гэж шууд нэрлэсэн юм. Удалгүй түүний гэр бүлийнхэн цахилгаан тамхины бизнестэй хамааралтай гэдэг мэдээлэл олон нийтийн сүлжээгээр хөвөрсөн.

Тэгвэл эрхэм сайд энэ удаад өөрийн сонгогдсон тойрог, сэлэнгэчүүдийн шүтээн төдийгүй, 2000 гаруй жилийн тэртээ Монгол төр анх үүссэн бэлгэдлийг агуулж буй Ноён уулыг ухуулах санаачилга гаргав.

Зүүнхараагийн нутагт орших Ноён уулын алтны нөөц хэзээнээсээ л эрх мэдэлтнүүдийн эдийн засгийн сонирхлыг татаж ирсэн. Энэ удаад Ноён уулын дархан цаазат газрын хилийн заагт хамаарч буй Гацуурт, Эрээн-Баавгайтын ордын нөөцийг УИХ-ын тогтоолоор ухах эрхийг олгох санаархал гарлаа.

Өмнө нь “Алт-3” хөтөлбөрийн хүрээнд эдгээр ордыг ашиглах санаачилга гарч байсан. Гацуурт 42.3, Эрээн-Баавгайт 10.5 тонн буюу нийт 52.8 тонн алтны нөөцтэй гэдгийг олон жилийн турш ярьж байгаа. Ноён ууланд байгаа гэх 52.8 тонн алт нь өнөөдрийн ханшаар ойролцоогоор 7.47 тэрбум ам.доллароор үнэлэгдэнэ. Үүнийг монгол төгрөгт шилжүүлбэл, ойролцоогоор 25.7 их наяд төгрөгтэй дүйх баялаг буюу дээрх санаачилгын цаана асар их мөнгө яригдаж байна.

Тиймээс л Гацуурт, Эрээн-Баавгайт ордыг Ноён уулын дархан цаазат газрын хилийн заагаас хасуулах тогтоолын төслийг УИХ-аар яаралтай горимоор хэлэлцүүлэхээр өргөн барьсан хэрэг.

Б.Шархүү