Ардчилсан намын Ерөнхий нарийн бичгийн дарга С.Баярцогтын 2026 оны зургаадугаар сарын 3-ны өдрийн Б/84 дүгээр тушаалаар нийслэлийн Ардчилсан намын Хэрэг эрхлэх газрын даргаар Пүрэвсүрэнгийн Билгүүнийг томилжээ. Ардчилсан нам өнгөрсөн таван сарын хугацаанд бүрэн шинэчлэлийг хийж, намын гишүүний бүртгэл, зохион байгуулалтын ажлын хүрээнд аймаг, дүүргийн намын байгууллагуудаа шинэчлэн зохион байгуулж, Үндэсний бодлогын хороогоо сонгон, Их хурлаа хийж, Хяналтын ерөнхий хороогоо байгуулсан юм. Энэ дагуу нийслэлийн Ардчилсан намын Хэрэг эрхлэх газрын даргын томилгоог хийжээ. П.Билгүүн нь ШУТИС-ийн Бизнес удирдлага, хүмүүнлэгийн сургуулийг маркетинг менежмент, бизнесийн удирдлагын чиглэлээр суралцаж төгссөн бөгөөд БНХАУ-ын Бээжин хотын "Minzu" их сургуулийг эдийн засаг, олон улсын худалдааны мэргэжлээр магистр хамгаалсан байна. Тэрбээр 2026 оноос АН-ын Олон нийттэй харилцах хэлтсийн даргаар ажиллахаас гадна УИХ дахь АН-ын бүлгийн зөвлөхөөр ажиллажээ.