ОХУ-ын ерөнхийлөгч Владимир Путин барууны амьдралын хэв маягийг дуурайдаг хүмүүсийг урвагчид гэж буруутгадаг ч гэлээ өөрөө нууц хүүхдүүдээ британи асрагч нарт даатгасныг сүүлийн үеийн шинэ тайланд дурджээ. Олимпийн аварга, уран сайхны гимнастикийн домогт тамирчин Алина Кабаевагаас төрсөн гэгддэг хоёр хүүгийн боловсрол хүмүүжлийг жил бүр хэдэн мянган фунт стерлинг зарцуулан хувийн багшид даатгадаг. Путины НАТО-ийн эсрэг үг хэллэг улам ширүүн болсоор байгаа ч нөгөө талд түүний долоо болон 11 настай хоёр хүүг "дайсан" орнуудын багш, асрагч нар хүмүүжүүлж байна.

Кабаевагаас төрсөн хоёр хүүг Владимир Жуниор /7/ болон Иван /11/ гэдэг бололтой.

"Radio Svoboda"-ийн мөрдөн шалгаснаар хоёр хүүд гэрээр англи, герман зэрэг Европын орнуудын хэлийг гэрийн багш нар нь заадаг. Мөн Их Британи, Герман, Австри зэрэг орноос ирсэн 20 орчим багш, асрагч нар тэднийг тойрон хүрээлж байдаг.

Хөвгүүдийн амьдардаг тансаг зэрэглэлийн байшинг пуужингийн довтолгооноос хамгаалах системээр тоноглосон гэж тайланд мэдээлжээ. Түүнчлэн хөвгүүд сургуульд явдаггүй, үеийнхээ хүүхдүүдтэй харилцдаггүй. 73 настай Путин өөрөө халдвар хамгааллын дэглэмийг сайтар сахидаг. Тийм учраас хөвгүүдийн ойр тойрныг ч ариутгалын хатуу дэглэмтэй байлгаж, хоол хүнс, өдөр тутмын үйл ажиллагааг нь нарийн бүртгэж, хянадаг.

Асрагч, үйлчлэгч, багш нар нь Путины хөвгүүдийн гэрт байрлаж ажилладаг бөгөөд сардаа 8000 ам.доллараар цалинждаг аж.

Мэдээж хүүхдүүдэд зааж болох, болохгүй зүйлийг нь тэдэнд хатуу анхааруулсан байдаг. Үүнд бэлгийн боловсрол, ЛГБТ сэдэв зэрэг орно. Тайланд дурдсанаар Путины хөвгүүд дүрд орж тоглохдоо заавал эрэгтэй хүний дүрд л орж тоглох ёстой байдаг.

Дотоод эх сурвалжийн мэдээлснээр, цалин сайтай ч гэлээ тэр гэрт ажиллах нь тийм сайхан байгаагүй аж. Ажилтнууд өөрсдийгөө ертөнцөөс бүрэн тусгаарлагдсан, тушаал биелүүлж буй роботтой зүйрлэжээ. "Harry A" гэх нэрээр тэмдэглэгдсэн англи хэлний багш хөл хориотой адил нөхцөл байдлаас залхаж, шантарсан тул хоёр сарын цалингүй чөлөө хүсч байсан тохиолдол ч бийг тайланд дурджээ.