Онцгой байдлын албаны төсөв 400 гаруй тэрбумд хүрсэн ч үйл ажиллагаа нь сайжирсангүй. Есөн давхраас дээшээ гал унтрааж чадахгүй байгаа бол доошоо 30 метрээс хүүхэд аварч чадахгүй харамсалтай хэрэг гарлаа. Хэдийгээр өмнөх жилүүдэд онцгой байдлын албаны чадавхыг төсөв мөнгөний хүрэлцээтэй холбон тайлбарладаг байсан.  Олон албан хаагч үүрэг гүйцэтгэж байхдаа амь эрсэдсэний улмаас 2024 оноос эхлэн төсвийг нь хоёр дахин нэмэгдүүлсэн.

Сангийн сайд нарын өгсөн мэдээллээр, Шадар сайдын багцад багтдаг ОБЕГ-ын 2023 төсөв 212 тэрбум төгрөг байсан бол 2024 онд 426 тэрбум төгрөг болж огцом өсгөсөн. Энэ нь бусад сайд нараас хамгийн өндөр хувиар нэмэгдсэн үзүүлэлт. Түүнээс хойш тэр хэмжээндээ хадгалагдаж буй. Гадаадын хөнгөлөлттэй зээл, тусламж инхэнх нь энэ салбарт орсноор зарцуулах мөнгө нь ийнхүү өссөн. Гэвч албан хаагчид үүргээ гүйцэтгэж байхдаа осол гэмтэлд өртөх, үүрэг гүйцэтгэлийн үр дүн сайжраагүй. Харин ч муудсаныг өнгөрсөн хугацаанд гарсан гамшигт үзэгдлүүд баталлаа. Онцгой байдлын ерөнхий газрыг генерал Г.Ариунбуян энэ хугацаанд удирдсан бөгөөд албаны техник хэрэгсэл сайжраагүйг өөрөө хэлсэн байна.

Тэрбээр Онцгой байдлын удирдаж байсан хошууч генерал Т.Бадралын хамт эрх мэдэл, албан тушаалаа урвуулан ашигласан гэх үндэслэлээр шалгагдаж байсан ч хэрэг замхарсан. Анх 2016 онд Авлигатай тэмцэх газраас хошууч генерал Т.Бадрал, бригадын генерал Г.Ариунбуян нарыг яллагдагчаар татан шалгаж, шүүхийн шатанд шилжсэн. Хэрэг шүүхэд шилжих явцад Ерөнхийлөгч У.Хүрэлсүх Т.Бадралыг БНХАУ-д Элчин сайдаар томилсноор хэрэг замхарсан. Хэргийг тодруулбал, Т.Бадрал, Г.Ариунбуян тэргүүтэй албан тушаалтнууд нь 17 тендерийг хууль бусаар явуулсан байдаг. Тухайлбал, 1988 оны хуучин нэг автомашин нийлүүлсэн, мөн онд гал унтраах, аврах хэрэгслийн бүрэлдэхүүнд багтдаг майхан, гал унтраах хөөс зэрэг 400 гаруй сая төгрөгийн бараа бүтээгдэхүүнийг сонгон шалгаруулалт зарлалгүй явуулсан. Мөн ОБЕГ-ын сургалтын төсвийн 500 гаруй сая төгрөгөөс албан тушаалтны хамаатны  компанид 275 саяыг нь өгч, гал унтраах дөрвөн автомашины гарааж бариулсан зэрэг төсвийн хөрөнгийг зориулалт бусаар зарцуулж, шамшигдуулсан үйлдлүүд нь мөрдөн байцаалтаар батлагдсан байдаг.

Энэ хэргийг хоёр жил гаруй хугацаанд шалгаж, 2019 оны дөрөвдүгээр сард прокурорт шилжүүлсэн хэдий ч прокуророос мөрдөн байцаалтын ажиллагаа дутуу хийгдсэн гэх үндэслэлээр АТГ-т буцаасан юм. Улмаар АТГ-аас хэргийн нэмэлт мөрдөн байцаалтыг явуулж дуусаад, дахин шилжүүлснээр прокурор уг хэргийг хянасан замхарсан хэргүүдийн нэг билээ. Эцэст нь Т.Бадрал. Г.Ариунбуян нарын хэрэг хөөн хэлэлцэх хугацаа дууссан гэх үндэслэлээр хаагдсан юм.

Б.Дорж