Хойд Солонгосын удирдагч Ким Жон Ун Ажилчдын намын төвийн боловсон хүчний сургууль үүсгэн байгуулагдсаны 80 жилийн ойд зориулсан арга хэмжээнд оролцжээ. Энэ үеэр Өмнөд Солонгосын Сувон хотод саяхан болсон Азийн хөлбөмбөгийн холбооны эмэгтэйчүүдийн аваргуудын лиг түрүүлсэн "Naegohyang" эмэгтэйчүүдийн хөлбөмбөгийн клуб "U-17" Хойд Солонгосын эмэгтэйчүүдийн хөлбөмбөгийн үндэсний багтай тоглосон байна.

"U-17" нь Хятадад болсон "AFC U-17" эмэгтэйчүүдийн Азийн аварга шалгаруулах тэмцээний цомыг өргөсөн баг.

Уг арга хэмжээний хамгийн онцлохуйц зүйл нь "Naegohyang" эмэгтэйчүүдийн хөлбөмбөгийн клубынхэн Ким Жон Унтай уулзах үеэрээ нулимсаа урсган, баярлаж хөөрцгөөсөн явдал байв. Гэтэл тэд Өмнөд Солонгост очихдоо ч, түүхэн ялалт байгуулсан хойноо ч хөндий хүйтэн царайлж, нүүрний хувирал огт гаргаагүйгээрээ гайхагдаад байсан билээ. Тэр бүү хэл Өмнөд Солонгосын сэтгүүлч БНАСАУ гэхийн оронд "хойд тал" гэсэн үгийг ашигласнаас болж хэвлэлийн бага хурлыг орхин гарч явсан дүр төрхтэй нь энэ баяр хөөр нь зөрчилдсөн харагдаж байв.

Тэмцээний өмнө Ким Жон Ун хоёр багийн тамирчид болон дасгалжуулагчидтай уулзаж, баяр хүргэсэн байна.

Ким Жон Ун сургуулийн нээлтийн арга хэмжээний үеэр үг хэлэхдээ "Намын боловсон хүчнийг төлөвшүүлэх нь хэзээ ч өнөөдрийнх шиг яаралтай, эсвэл хувь тавилантай үйл хэрэг байгаагүй. Нам анх байгуулагдах үеийг бодвол одоо ард түмний эсрэг янз бүрийн үзэгдлүүд гарч ирэх болжээ. Гэхдээ манай ард түмний мөн чанар огт өөрчлөгдөөгүй бөгөөд цаашид ч нөхцөл байдлыг үл харгалзан өөрчлөгдөхгүй хэвээр байх болно" гэжээ.