НЭМЭЛТ: 

Улсын дээд шүүхийн Ерөнхий шүүгчээр Ц.Цогтыг томилуулах саналыг Ерөнхийлөгчид хүргүүлэхээр тогтов. Шүүгчдийн зөвлөгөөнөөр Монгол Улсын шүүхийн тухай хуулийн 19 дүгээр зүйлийн 19.2.4-т заасан Ерөнхий шүүгчийг сонгох асуудлыг хэлэлцсэн юм. Ерөнхий шүүгчид Эрүүгийн хэргийн танхимын тэргүүн, шүүгч Ч.Хосбаяр, Захиргааны хэргийн танхимын шүүгч Ц.Цогт нарын нэрийг дэвшүүлснээс шүүгчдийн олонхын саналаар Ц.Цогтыг Улсын Дээд шүүхийн Ерөнхий шүүгчээр томилуулах саналыг Монгол Улсын Ерөнхийлөгчид хүргүүлэхээр тогтлоо.

ШҮҮГЧДИЙН ЗӨВЛӨГӨӨН БОЛЖ БАЙНА

Улсын дээд шүүхийн шүүгчдийн зөвлөгөөн өнөөдөр /2026.06.03/ 16.30 цагт эхэлжээ. Зөвлөгөөнөөр 2026 оны тавдугаар сарын 29-ний өдрийн шүүгчдийн зөвлөгөөнөөр Монгол Улсын шүүхийн тухай хуулийн 19 дүгээр зүйлийн 19.2.4-т заасан Ерөнхий шүүгчийг сонгох асуудлыг хэлэлцэхээр нийт шүүгчид санал нэгдсэн байна. Дээрх саналыг үндэслэн Монгол Улсын дээд шүүхийн Ерөнхий шүүгч Шүүгчдийн зөвлөгөөнийг 2026 оны зургаадугаар сарын 3-ны өдөр товложээ. Хяналтын шатны бүх шүүгч буюу 24 шүүгчээс 22 шүүгч зөвлөгөөнд оролцож байна. 

ЕРӨНХИЙ ШҮҮГЧИЙГ СОНГОХ УЛСЫН ДЭЭД ШҮҮХИЙН БҮРЭЛДЭХҮҮН

Ерөнхий шүүгч:

• Д.Ганзориг /өчигдөр бүрэн эрх нь дууссан/

Танхимын тэргүүн:

• Эрүүгийн хэргийн танхимын тэргүүн Ч.Хосбаяр, Иргэний хэргийн танхимын тэргүүн Н.Баярмаа, Захиргааны хэргийн танхимын тэргүүн Д.Мөнхтуяа.

Шүүгчид:

• Шүүгч Б.Ундрах, М.Батсуурь, Б.Батцэрэн, Б.Цогт, Д.Цолмон, Х.Эрдэнэсувд, П.Соёл-Эрдэнэ, Г.Банзрагч, Б.Амарбаясгалан, Ц.Цогт, С.Соёмбо-Эрдэнэ, Д.Батбаатар, М.Пүрэвсүрэн, Н.Батзориг, Н.Батчимэг, Ц.Оч, Э.Золзаяа

Монгол Улсын Үндсэн хуулийн цэцийн 2026 оны тавдугаар сарын 27-ны өдрийн их суудлын хуралдаанаар Улсын Их Хурлаас 2021 оны нэгдүгээр сарын 15-ны өдөр баталсан Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “Улсын дээд шүүхийн Ерөнхий шүүгчийг Улсын дээд шүүх санал болгосноос хойш Ерөнхийлөгч 14 хоногийн дотор зургаан жилийн хугацаагаар, зөвхөн нэг удаа томилно.” гэсэн заалтын “… зөвхөн нэг удаа …” гэсэн хэсэг нь Монгол Улсын Үндсэн хуулийн цэцийн 2016 оны 12 дугаар дүгнэлтийн дагуу хүчингүй болсон зохицуулалтыг агуулгаар нь дахин сэргээсэн гэж үзэн Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “… зөвхөн нэг удаа …” гэсэн хэсгийг хүчингүй болгон шийдвэрлэж, Үндсэн хуулийн цэцийн 2026 оны гуравдугаар тогтоол гаргасан юм.

ЕРӨНХИЙ ШҮҮГЧИД Ч.ХОСБАЯР, Б.БАТЦЭРЭН НАРЫН НЭР ЯРИГДАЖ БАЙНА

Ингэснээр УДШ-ийн ерөнхий шүүгчийг зургаан жилийн хугацаагаар зөвхөн нэг удаа томилох заалтыг хүчингүй болгож, Д.Ганзориг улирч дахин зургаан жил ажиллах эрхтэй болсон. Гэхдээ хөшигний ард Ч.Хосбаяр болон Б.Батцэрэн нарыг нэр дэвшүүлж, томилох асуудал яригдаж байна.