Таван жилийн өмнө хөхөө өвлийн хүйтнээр төрөөд удаагүй ээжийг гэрийн шаахайтай нь эмнэлэг хооронд зөөвөрлөсөн үндэслэлээр У.Хүрэлсүхийн танхим огцорч байгаагаа зарласан бол гурван настай хүүхэд цооногт унаж амиа алдсан хэрэгт Ерөнхий сайд Н.Учрал холбогдох албан тушаалтнуудад хариуцлага тооцохоо мэдэгдлээ.

Энэ талаар Ерөнхий сайд Н.Учрал  “Төв аймгийн Заамар суманд өрөмдлөгийн цооногт унаж амиа алдсан охины аав ээж, ар гэрт Монгол Улсын Засгийн газрын өмнөөс гүн эмгэнэл илэрхийлье.

Онцгой байдал, цагдаа, орон нутгийн албан хаагчид, иргэд хичээн ажилласан боловч гуравхан настай бяцхан охины амь эрсэдсэнд хүн бүрийн сэтгэл зүрх шимширч байна.

Энэ хэрэг явдал бол нэг ам бүлийн хагацал төдий бус хүүхдийн амьдрах эрхийг хамгаалах, хөдөлмөрийн аюулгүй байдал, хууль стандартын сахин мөрдөх, сахилга хариуцлага суларсаны үр дагавар юм.

Байгаль орчны нөхөн сэргээлт, хүүхдийн эрх, хүүхэд хамгааллыг тогтолцоогоор нь өөрчлөн сайжруулах шаардлагатай байна.

Иргэдийнхээ амь нас, аюулгүй байдлыг сахин хамгаалах нь төрийн үндсэн үүрэг мөн. Хуулиар хүлээсэн ажил үүргээ биелүүлээгүй, хайнга хандсан албан тушаалтнуудад хатуу хариуцлага тооцох болно” гэж мэдэгдэв.

Ямартай ч хариуцлага тооцох замаар засгаа аврах ажиллагааг эхлүүлсэн нь энэ. Гэхдээ сайд огцруулах уу, дарга чөлөөлөх үү гэдэг одоогоор тодорхойгүй. Ерөнхий сайд өөрт ирж буй галыг намжаахын тулд юутай ч хариуцлага тооцох болсноо зарлав.

Н.Учралын танхим байгуулагдаад хоёр сар орчмын хугацааг элээж байна. Энэ хооронд таатай, таагүй олон үйл явдал болсон ч гурван настай охиныг аврах ажиллагааг Онцгой байдлын албаныхан 50 гаруй цагийн турш гүйцэтгээд хүчин мөхөстсөн нь Монгол Улсад олон зүйл дээр хариуцлага алдагдсаныг илчиллээ гэж хэлж болно. Нөгөө талдаа авлигын үр уршиг ямар их хор хөнөөл дагуулж байгааг ч харууллаа.

Авлигачид нь авлигын мөнгөөрөө хэдэн зуун сая төгрөгийн үнэтэй адууны жүчээ бариулж, зарим нэг нь гэртээ багтахгүй болсон мөнгөө алтан гулдмай болгож байхад эрдэнэт хүний амь насыг аврах үүрэг хүлээсэн Онцгой байдлын алба нь 30 метр шороо ухах тоног төхөөрөмжгүй, албан хаагчид нь техник хэрэгслээ ажиллуулах чадварт суралцаагүй байгаагийн хариуцлагыг хэн хүлээх вэ. Онцгой байдлын асуудал эрхэлсэн дарга нь уу, аль эсвэл төсөв хөрөнгийг нь тавиад асуудлыг нь шийдэлгүй явж ирсэн УИХ уу.

Өнгөрсөн жилийн намар Хөвсгөл аймагт хоёр настай хүүхэд сураггүй болж эрэл хайгуул болоход мөн л онцгойгийнхонд техник хэрэгсэл, ур чадвар дутсан.  Эрэл хайгуулын ажиллагааг долоо дахь хоногтоо үргэлжлүүлсний эцэст олсон. Хэрвээ цаг алдаагүй бол хүүг аврах бүрэн боломж байсан нь шүүх байгууллагын шинжилгээгээр баталгаажсан. Учир нь хүүг харангадаж амиа алдсан байна гэх дүгнэлтийг гаргасан билээ.

Энэ удаагийн осол өөр ч гэлээ аврах ажиллагааг гардсан Онцгой албаныхны хувьд хүнээ сургах, техник технологио сайжруулахаас эхлээд олон зүйлийг хийх шаардлагатай нь харагдлаа.

Нөгөө талдаа уул уурхайн салбар Монгол Улсын эдийн засгийг чирж явж байна гэж сайрхдаг ч бодит байдал дээрээ нөхөн сэргээлт хийдэггүйн үр уршгаар олон хүний амь насыг эрсдэлд оруулахаар болсныг дээрх үйл явдал харууллаа. Иймээс эл асуудалд хяналт тавьж ажиллах ёстой байсан яам, агентлагийн дарга, даамлуудад хариуцлага тооцох уу, аль эсвэл доод шатанд огцруулаад өнгөрөх үү гэдэг эцсийн шийдлийг Ерөнхий сайд гаргах болж байна.

Г.ХОРОЛ