НЭМЭЛТ: 

УИХ-ын гишүүн, Шадар сайд Н.Номтойбаяр өнөөдөр /2026.05.30/ Онцгой байдлын ерөнхий газарт ажиллах үеэрээ сэтгүүлчдэд дараах мэдээллийг өглөө.

-Аюулгүй байдлыг хангах үүднээс урьдчилсан хяналт шалгалтыг эхлүүлнэ. Техникийн нөхцөлөө шалгуулахгүй гэх мэтчлэн хүний эрүүл мэнд аюулгүй байдлыг хангахтай холбоотой хяналт шалгалтыг хийлгүүлэхгүй байж болохгүй. Жишээлбэл, өнгөрсөн хугацаанд 1360 обьектод шалгалт хийхэд 5270 зөрчил гарсан байна. Нэг обьектод нэлээд хэдэн  зөрчил илэрсэн гэсэн үг. Засгийн газрын ирэх долоо хоногийн хурлаар хяналт шалгалтын тогтоол албажина. Шадар сайдын хувьд одоо албан тушаал дээр гарын үсэг зурж, хяналт шалгалтыг нэн яаралтай эхлүүлж байгаа.

Хүмүүс хянаж шалгуулах дургүй, иргэдийнхээ эрүүл аюулгүй орчинд амьдрах нөхцлийг хангахын тулд төр хяналт шалгалтаа хуулийн дагуу хийнэ.

Өнгөрсөн хугацаанд хяналт шалгалтын эрх зүйн орчин дэндүү суларсан юм байна, төрийн хариуцлага ч суларсан юм байна. Энэний үр уршиг нь хүний амь золиосолж байна, энийг таслан зогсооё.

Гурван настай хүүхдийг аврах ажиллагаанд хувиараа алт олборлогч нарыг оруулаагүй гэж иргэд их бухимдаж байна. Аврах ажиллагаанд тэднийг оролцуулахгүй байх шийдвэр гаргасан Онцгой байдлын албаныхны зөв. Яагаад гэхээр амь эрсэдсэн ажил. Мэргэжил арга зүйн туршлагатай, хуулиар хүлээсэн хариуцлагатай ажил.

Аврах ажиллагааг удаан явуулсан гэж шүүмжилж байна. Уучлаарай, цагт 25-30 см малталт хийж чадсан. Өндөр нь 1 метр өргөн нь 80 см. Доргилт өгч болохгүй, хүчтэй нүдэж болохгүй.

Нүдэхээр хөрс нь нурчих гээд байдаг. Хүн аврах гээд өөрсдөө үхчих гээд байдаг. Ийм нөхцөл байдалд аврах ажиллагааг явуулсан. Зураг харчихаад шүүмжлээд байх шаардлагагүй.

Хөндлөнгийн эксперт ийм хувилбар байсаар байтал буруу ажилласан гэж дүгнэвэл хариуцлага хүлээхэд бэлэн.

20-ын хувин онгойлгочихсон шороо татаж байна гэх, өөр ямар арга байгаа юм. Шороог өөрөөр яаж татах юм.

Онцгой байдал сая гурван зүйлд ялагдлаа. Нэгдүгээрт, хариуцлагагүйн тогтолцоонд ялагдлаа, хоёрдугаарт, цаг хугацаанд ялагдлаа, гуравдугаарт, газар шорооны нөхцөл байдалд ялагдлаа. Давж чадсангүй.

Мэргэжлийн хүмүүс газар дээр нь ажиллаад нөхцөл байдлыг хэлээд байхад зарим зүйл хэрээс хэтэрч байна.

Сая болсон харамсалтай нөхцөл байдал бидэнд ямар үнэтэй сургамж өгөв. Хэрхэн яаж урьдчилан сэргийлж, хэчнээн хүүхэд, хүний амь аврах обломж байна, үүн рүүгээ оръё гэлээ.

ОБЕГ: Аврах ажиллагаа 55 цаг үргэлжилж, 59 цагийн дараа цогцосыг гаргасан

Уурхайн цооногт унаж амиа алдсан гурван настай охиныг аврах ажиллагаа хэрхэн өрнөсөн талаар Онцгой байдлын ерөнхий газраас өнөөдөр /2026.05.30/ мэдээлэл хийлээ.

Онцгой байдлын ерөнхий газрын Ажиллагааны удирдлагын газрын дарга, хурандаа А.Дашням:

-Хүүхэд 30.1 метрийн гүнд осолдсон байсан. Манай аврагч нарыг ослын газарт хүрэхэд хүүхэд хагас хэвтээ, зүүн гар нь дээрээ, мөр толгой нь цул шороонд хөшигдөөд дарагдсан. Газрынхаа гүнд  очсон байсан. Хүүхэд амь насаа алдсан байсан.

Аврах ажиллагаа 55.19 цаг үргэлжилж, хүүхэд унаснаас 59:46 цагийн дараа цогцосыг гаргаж холбогдох хүмүүст хүлээлгэн өгсөн.

Осол нь Монгол Улсын хэмжээнд анх удаа гарлаа. Уурхайн осол гардаг, гэхдээ энэ удаагийнх давчуу зайнд гүнд гарсан осол юм. Онцгой байдлын байгууллага уул уурхайн инженерүүдтэй зөвлөлдөж өөрсдийн арга тактикийн хүрээнд ажилласан.

Яг хэдэн цагт нас барав гэдгийг мэргэжлийн байгууллага тогтооно.

Аврах баг очоод могойн нүд болон бусад хэрэгслээр хэмжилт хийн шалгахад амьсгалын шуум илэрч амьд байна гэж тооцоод хүчилтөрөгчөөр хангах, шөнийн цагт орчны дулааныг алдагдуулахгүй байх арга хэрэгслийг ашигласан.

Тавдугаар сарын 28-ний үүрээр 04:00 цагаас хойш амьсгалын шуум сонсогдохоо больсон. Гэхдээ бид тасралтгүйгээр хэмжилт хийн, тэнд ажиллаж байсан эрүүл мэндийн байгууллагынхныг авч ирж, камерт үзүүлсэн.

Гэхдээ мэргэжлийн байгууллага биечилж харахгүй бол тогтоох боломж байгаагүй. Бид нар амьд байх боломжтой гэдэг утгаар тасралтгүйгээр ажиллагааг үргэлжлүүлсэн. Ажиллагааг зогсоосон цаг, минут байгаагүй” гэлээ.

Сануулахад, Төв аймгийн Заамар сумын нутаг дэвсгэрт уурхайн цооногт 3 настай хүүхэд 40-50 метрийн гүн нүхэнд унасан харамсалтай осол тавдугаар сарын 27-нд болсон юм. Осол болсон газар руу Онцгой байдлын албанаас нисдэг тэрэг болон автомашинтай аврах багийг илгээсэн.

Ослын голомтод Уул уурхайн аврах 09 дүгээр анги, Төв аймгийн Онцгой байдлын газрын алба хаагчид болон бусад байгууллагын нийт 102 хүн ажиллажээ. Аврах ажиллагаанд 16 байгууллагын 30 автомашин, хүнд даацын найман техник, ковш, экскаватор, кран, шатахуун тээвэрлэгч болон гар ажиллагааны 138 багаж хэрэгслийг дайчлан ажиллажээ.

Г.ХОРОЛ