Бусад сармагчнууддаа адлагдаж, ганцаараа чихмэл тоглоомоо тэврэн байдаг Панч гэх 9 сартай бяцхан сармагчны бичлэг энэ оны эхээр цахим сүлжээнд тархаж, олон хүний сэтгэлийг хөдөлгөсөн. Панч амьтны хүрээлэнгийн ажилтны өгсөн чихмэл тоглоомыг тэврэн, хаа ч явсан авч явж буй нь хүмүүсийн сэтгэлийг ихэд эмзэглүүлж байсан юм.

Тэгвэл түүний хашаанд ямар ч зөвшөөрөлгүйгээр нэвтэрсэн болон үйл явдлыг видео бичлэгт буулгаж байсан хоёр америк эрэгтэй баривчлагджээ. Цагдаагийн газрын мэдээлснээр, хэрэг явдал Ням гаригийн (2026.05.17) өглөө болсон байна. Хашаа руу үсэрч орсон 24 настай эрэгтэй өөрийгөө их сургуулийн оюутан гэж мэдүүлсэн бол видеог бичиж байсан эрэгтэй өөрийгөө 27 настай дуучин гэж мэдэгдсэн байна.

Цахим сүлжээнд тэдний видео нийтлэгдсэн байх бөгөөд үүнд криптовалют сурталчилсан цамцтай эрэгтэй чихмэл тоглоом барин хашаа давж орох нь харагдана. Амьтны хүрээлэнгийн ажилтнууд тухайн хүнийг хурдан гаргажээ. Цагдаа нарын мэдээлснээр ямар ч амьтан гэмтээгүй. Тухайн хоёр эрэгтэй уг хэргийг няцаасан боловч амьтны хүрээлэнгийн үйл ажиллагаанд саад учруулсан хэргээр баривчлагдсан байна.

Уг хэрэг гарсны дараа амьтны хүрээлэнгийн удирдлага аюулгүй байдлаа сайжруулж, үзэгчдийн хязгаарлалтын бүсийг өргөтгөх болон хамгаалалтын тор суурилуулах шийдвэр гаргасан байна. Мөн сармагчны хашааны ойролцоо зураг авахыг бүрэн хориглох боломжийг авч үзэж байгаа бөгөөд "YouTuber"-үүдийн зураг авах хүсэлтийг түр хугацаанд зогсоожээ. Амьтны хүрээлэнгийн ажилтнуудын хэлснээр, тухайн хоёр эрэгтэй амьтдад ойртож чадаагүй бөгөөд хурдан саатуулагдсан байна.