МАН дотор Нийслэлийн Засаг дарга асан Х.Нямбаатарын ажлыг хэнд даатгах вэ гэдэг том зодоон өрнөж байна.  Сошиалаар дамжуулж МАН Ерөнхий сайд асан Г.Занданшатар, Эдийн засаг хөгжлийн сайд Ж.Энхбаяр, СДМЗХ-ны ерөнхийлөгч Б.Пүрэвдагва, Нийслэлийн Иргэдийн төлөөлөгчдийн хурлын МАН-ын бүлгийн дарга Ж.Сандагсүрэн, Нийслэлийн Иргэдийн төлөөлөгчдийн хурлын дарга асан А.Баяр тэргүүтэй хэд, хэдэн нэрийг зориудаар сэвж, олон нийтээс тест ч авч амжлаа.

Эцэст нь  МАН-ын дэргэдэх СДМЗХ-ны ерөнхийлөгч Б.Пүрэвдагвыг Улаанбаатар хотын захирагчид нэр дэвшүүлэхээр тогтов, энэ тухай хэвлэлүүд бичиж эхлэв.

Түүнийг Улаанбаатар хотын захирагч болгох сонирхол аль эртнээс л явсан. Засгийн газрыг Л.Оюун-Эрдэнэ удирдаж байх үеэс л "Ерөнхийлөгчийн экс хүргэн Б.Пүрэвдагва Нийслэлийн Засаг дарга болох нь" гэх шуум дэгдэж байв.  Тиймээс олон нийтэд энэ нэр шинэ биш.

Одоогоор МАН Удирдах зөвлөлөө хуралдуулж, Улаанбаатар хотын захирагчид хэнийг нэр дэвшүүлэхээ албан ёсоор хэлэлцээгүй байгаа ч Х.Нямбаатар өнөөдөр Нийслэлийн МАН-ын хорооны хурлын товыг зарлахаа мэдэгдсэн.

Иймээс тун ойрын хугацаанд Удирдах зөвлөлөөс Улаанбаатар хотын захирагчийг Нийслэлийн Иргэдийн төлөөлөгчдийн хуралд санал болгох юм.  Хэвлэлүүдийн өнөөдрийн гол дүр болоод байгаа Б.Пүрэвдагвын ажлын туршлагыг харвал 2020-2024 оны хооронд Нийслэлийн Иргэдийн төлөөлөгчдийн хурлын төлөөлөгчөөр ажиллажээ.

• 2009-2011 онд Монгол Ардын Намын Удирдах Зөвлөлийн Ажлын албаны Намын байгуулалтын газрын Улс төрийн ажилтан
• 2011-2012 онд Монгол Ардын Намын Ерөнхий нарийн бичгийн даргын Шадар туслах
• 2012-2013 онд УИХ-ын Тамгын газарт Референт
• 2013-2015 онд Нийгмийн Ардчилал Монголын Оюутны Холбооны Удирдах зөвлөлийн гишүүн
• 2016-2017 Монгол Ардын Намын Ерөнхий нарийн бичгийн даргын орон тооны зөвлөх
• 2017 оноос Монгол Ардын Намын Удирдах Зөвлөлийн Ажлын албаны Орон нутаг, намын хөгжлийн хэлтсийн дарга
• 2018-2020 он МАН-ын Орон нутаг, намын хөгжлийн хэлтсийн дарга,
• 2020 оноос НИТХ-ын Төлөөлөгч,
• 2020-2021 он НАМЗХ-ны Ерөнхий нарийн бичгийн дарга,
• 2021 оноос МАН-ын Намын байгуулалтын газрын дарга
• МАН-ын Бага хурлын гишүүн,
• СДМЗХ-ны ерөнхийлөгч
• “Thanks man” ТББ-ын тэргүүн

Энэ хугацаанд нийслэлчүүддээ бол танигдах хэмжээний ажил хийгээгүйг хэн хүнгүй гадарлах биз. Гэхдээ бас нийслэлийн ажлыг огт мэдэхгүй гэсэн үг биш.  Харин Ардын намын ажлыг бол Шадар туслахаас эхлэн гүйцэтгэсээр Залуучуудын холбоог нь эдүгээ удирдаж байна. Хоёр жилийн өмнө тэрбээр СДМЗХ-ны ерөнхийлөгч болж, одоогийн Ерөнхий сайд Н.Учралаас тамгаа гардаж байсан түүхтэй.

МАН бол Залуучуудын холбоо, Эмэгтэйчүүдийн холбоо зэргээ ардаа заавал татуургатай хүндээ даатгаж ирсэн жишигтэй. Түүнээс өөрийн бяр чадлаар цонх, хаалгыг нь цөм өшиглөөд ороод ирэх залууд даатгаж байсан удаагүй.

Иймээс Б.Пүрэвдагвын хувьд ардаа том “эзэн”-тэй гэж ойлгож болно.  Илүү товчилбол, олон нийтэд харуулахад бол залуусынх нь төлөөлөл, харин цаад углуургаараа бол том “хаан”-ы хүн.

Залуучуудынхаа хүчийг ашиглан хотыг хөдөлгөснөөр ирж буй сонгуульд нийслэл амжилт үзүүлнэ гэж тооцов уу, аль эсвэл даалгавар гүйцэтгэх хамгийн итгэлтэй хүн нь тул МАН түүнийг Х.Нямбаатарын залгамжлагчаар тодруулахаар шийдэв үү, ямарч байсан нийслэл гэх том айл удахгүй захирагчтай болох нь.

Нэг үеэ бодвол хот мөнгөтэй болсон. Орон нутаг өөрөө бие даан хөгжих боломжийг олгохын тулд УИХ-аас хэд, хэдэн хуульд өөрчлөлт оруулснаар Нийслэл өөрөө бонд гаргахаас эхлээд асуудлаа шийдвэрлэх хөрөнгө оруулалтыг босгох эрх мэдэлтэй болсон. Түүнийгээ дагаад Улаанбаатар хотын захирагчийн эрх мэдэл ч томорсон.  Хөрөнгө мөнгөнд хавчигдан асуудлаа шийдвэрлэж чаддаггүй байсан нь хуулийн хязгаараар эцэслэгдсэн ч мөнгийг нь дагуулаад саах хүсэл  нам доторх бүлэглэлүүдийг завгүй болгосон ч гэж хэлж болно. Иймээс Улаанбаатар хотын захирагчаар хэн томилогдохоос нийслэлд том, том төслүүд хэрэгжих эсэх ч бас шийдэгдэнэ.

Г.ХОРОЛ