МАН доторх зөрчил тэмцэл чинээндээ тулж, Ерөнхий сайд Н.Учрал, Улаанбаатар хотын захирагч Х.Нямбаатар нарын хоорондын тэмцлээр тэсрэлт хийн МАН-ын цагаан байрыг дэлбэлэх шахам байхад Ерөнхий нарийн бичгийн дарга Я.Содбаатар “Х.Нямбаатарыг Улаанбаатар хотын захирагчаас чөлөөлсөн нь фракци хоорондын дотоод зөрчилтэй холбоогүй” гэж мэлзэх нь тэр. МАН-ын дарга, Ерөнхий сайд Н.Учрал хэзээний зодооныг эхлүүлчихсэн байхад генсек нь мэлзэх нь мэдрэмжгүйн дээр үнэнийг хэлэх зүрх зориггүйг харуулав. Ийм генсектэй нам 2027 оны Ерөнхийлөгчийн сонгууль, 2028 оны УИХ-ын сонгуульд ялалт байгуулна гэж байхгүй. МАН-ын дарга, Ерөнхий сайд Н.Учрал араа бодохгүй бол асуудал ирэхэд генсек нь галын шугамыг хаяад зугтахаар байгааг түүний дээрх байр суурь илэрхийлж орхив.

Намын гал тогоог хариуцна гэдэг чинь намын даргынхаа өмнөөс гал аваад гал ус руу ороход ч бэлэн бэлтгэгдсэн улстөрчийг хэлдэг. Харин МАН-ын Ерөнхий нарийн бичгийн дарга Я.Содбаатарт тийм харизм алга.

МАН түүхэндээ ийм сулбайсан Ерөнхий нарийн бичгийн даргатай ч байгаагүй л юм даа, өнгөрчээ.

Яг үнэндээ Засгийн газар нь махны бодлогоо алдчихсан байж, Улаанбаатар хотын захирагчийг махны үнийн өсөлтийг хязгаарласангүй гэх шалтгаанаар огцруулна гэдэг үнэндээ онигоо шүү, Ерөнхий сайд аа. Одоо тэгээд нөөцийн махыг хонины махыг нэг кг-ыг нь 13 мянган төгрөгөөр, үхрийн мах 1 кг-ыг нь 15000 төгрөгөөр борлуулахын тулд Хүнс хөдөө аж ахуй, хөнгөн үйлдвэрийн сайдын багцаас 10 тэрбумын татаас гаргаж зохицуулна гэдэг юу гэсэн үг вэ. Зуны дэлгэр цаг ирж байна, төр татаас гаргах шаардлагагүйгээр малчид өөрсдөө хонио Улаанбаатар хот руу портер машин дээр ачиж авч ирээд зардаг үе шүү дээ. Хөрсөн дээрээ бууцгаа, 10 тэрбум төгрөг эцсийн эцэст татвар төлөгчдийн мөнгө шүү сайд нар аа.

Г.ХОРОЛ