Хятадын жүжигчин Хоу Шианг "хөгширдөггүй эр" гэж хочилдог. Тэр хэдийгээр 40 настай ч хүүхдийн дүр бүтээсээр байна. Хоу Шианы ээж жирэмсэн байхдаа хоол тэжээлийн дутагдалд орсны улмаас хүүхдээ дутуу төрүүлжээ. Улмаар Хоу Шиан төрөхөөсөө өсөлт муутай байсан ч авьяас чадвараараа шүүмжлэгчдийн амыг таглаж чаджээ. Хоу Шианы оношийг олон нийтэд ил тод зарлаагүй ч эх газрын хэвлэл мэдээллийн хэрэгслүүд түүний нөхцөл байдлыг дутуу төрөлт болон төрөлхийн хөгжлийн саатлын удаан хугацааны үр дагавар гэж тодорхойлсон юм.

Түүний өсөлт, дуу хоолойны өнгө есөн настай үеийнх дээрээ гацжээ. Өдгөө түүний өндөр 160 метр хүрэхгүй, царай төрх нь ч хүүхдэрхүү. Танихгүй хүмүүс түүнээс насыг нь, хаана сурдагийг нь асуух нь элбэг байдаг.

Хоу Шиан 2005 онд "Home with Kids" цувралд тоглосноосоо хойш олны анхаарлыг татаж эхэлжээ. Тус цувралд тэрбээр өөрөөсөө долоо дүү хүмүүстэй хамт бага сургуулийн сурагчийн дүрд тоглосон байдаг. Тухайн үед Хоу Шиан 19 настай байв. Дараа жил нь 20 настайдаа тэрбээр "Stepfather" цувралд 14 настай хүүгийн дүрийг бүтээжээ.

Хүмүүс түүний хүүхэд төрхийг сул тал гэж харах нь байдаг ч яг үнэндээ түүний хувьд давуу тал болсон гэж тэр ярьдаг. 26 насандаа тэрээр "Tunnel Warfare" кинонд ухаалаг, дэггүй хүүгийн дүрд тоглож, найруулагчаасаа "анхаарал булаагч" гэх хоч авчээ.