УИХ-ын гишүүн Л.Гантөмөрөөс сэтгүүлчид цаг үеийн асуудлаар тодруулга авлаа.

Тэрбээр "Нийслэлийн Засаг дарга бөгөөд Улаанбаатар хотын захирагчийг үүрэгт ажлаас нь чөлөөлж буй асуудал болон махны үнийн өсөлтөөс тусдаа сэдэв. Хотын даргыг сольж байгаа явдал нь эрх баригч МАН-ын дотоод фракцуудын тэмцэл маш хүчтэй эрчимжиж буйн илрэл юм. Энэхүү тэмцэл нь УИХ дахь МАН-ын бүлгийн хуваагдлаас хальж, орон нутгийн засаглалын түвшинд шилжин өрнөж байна гэж дүгнэхээр байна.

Хоёрдугаарт, махны үнийн тухайд гэвэл, Монгол Улс сүүлийн 20 гаруй жилийн турш намартаа мах бэлтгэж, нөөцлөх тогтолцоог тасралтгүй хэрэгжүүлж ирсэн. Өөрөөр хэлбэл, жил бүрийн хавар мах ховордож, үнэ нь өсдөг зүй тогтолтой тул намрын бэлтгэсэн нөөцийн махыг хэрэглэхээс өөр сонголтгүй байдаг. Өнөөдрийг хүртэл махны нийлүүлэлтийг жилийн дөрвөн улиралд тогтвортой хадгалах эрчимжсэн хөдөө аж ахуйг хөгжүүлж чадаагүй байна. Тиймээс хоосон популизм хийж, нөөцийн мах бэлтгэдэг жишгийг хална гэж ярих нь өөрөө туйлын буруу юм.

Бидэнд энэ системийг задлах хөдөө аж ахуйн суурь байхгүй, намрын нядалгааны үеэр мах нөөцлөхөөс өөр аргагүй. Харин хамгийн гол нь энэхүү ажлыг үнэн зөв, шударга, ил тод зохион байгуулах нь чухал байна.

Гэтэл мах нийлүүлдэг компаниудын сонгон шалгаруулалт хуйвалдаантай явагдаж, цаана нь аль нэг дарга, албан тушаалтны эрх ашиг шургуулсан байдаг нь нууц биш юм. Нөөцийн мах бэлтгэж буй аж ахуйн нэгжүүд махаа ямар үнээр худалдаж авсан, хаана хадгалж байгаа болон хэзээ зах зээлд нийлүүлэх талаарх мэдээллээ олон нийтэд ил тод, нээлттэй мэдээлдэг байх ёстой.

Үүнээс гадна, өнгөрсөн намрын нийлүүлэлтийн үеэр шатахуун тасарч, томоохон хүндрэл үүссэн. Шатахуун тасалдуулж, эдийн засагт хохирол учруулсан эздэд өнөөдрийг хүртэл хэн ч хариуцлага хүлээлгээгүй байна. Тэдний хариуцлагагүй байдлаас болж Монгол Улсад хоёр том гацаа үүссэн. Эхнийх нь, газар тариалангийн салбарт буюу малын тэжээл бэлтгэх ажил саатсан. Дараагийнх нь, мал нядалгаа болон түүнийг дагасан мах бэлтгэлийн ажлууд бүхэлдээ гацсан явдал юм. Гэтэл Засгийн газраас шатахуун тасалдуулсан буруутнуудад огт хариуцлага тооцохгүй байгаа нь төрийн удирдлага буруу замаар явж буйг бүхэлдээ харуулж байна.

Монгол Улс бэлчээрийн мал аж ахуйтай бөгөөд эрчимжсэн аж ахуй руу бүрэн шилжиж амжаагүй хэвээр байна. Ирээдүйд эрчимжсэн аж ахуйд шилжсэн цагт л намар мах нөөцлөх шаардлагагүй болно. Тэр үед монголчууд өвлийн хүнсээ заавал урьдчилж базаах албагүй болж, цаг уур, улирлаас үл хамааран шинэ махаа тогтмол худалдан авах боломж бүрдэх юм. Энэ бүх дүр зургийг нэгтгэн дүгнэхэд төрийн бүх шатанд хариуцлагын тогтолцоо маш сул байна. Хамгийн харамсалтай нь, энэхүү хариуцлагагүй байдлыг засахыг огт оролдохгүй, зүгээр л намын дотоод зодоон, тэмцлээрээ халхавчлан цааш үргэлжлүүлэх хандлага руу шилжлээ.

Төрийн удирдлагууд хэрхэн хариуцлагагүй ажиллаж, амьдралаас тасарч байгааг би Пүрэв гаригт Эдийн засгийн байнгын хорооны хуралдаан дээр ч тодорхой хэлсэн. Тэд худал ярьж байна. Нэг талаар "Ж.Энхбаяр махны үнэд оролцохгүй" гэж ярьж байгаагаа зогсоох хэрэгтэй. Хамгийн хачирхалтай нь, үүнээс ердөө хоёр хоногийн дараа Ерөнхий сайд нь өөрөө гарч ирж, зах дээр мах ямар үнэтэй байгааг ч мэдэхгүй байж популизм хийсэн. Энэ бол тэднийг ажил хийхгүй, бодит амьдралаас дэндүү тасархай байгааг гэрчлэх тод жишээ юм" гэлээ.