"NEWS" агентлаг долоо хоногийн онцлох үйл явдлыг тоймлон хүргэж байна.

УЛААНБААТАР ХОТЫН ЗАХИРАГЧ Х.НЯМБААТАРЫГ ЧӨЛӨӨЛЛӨӨ

Ерөнхий сайд Н.Учрал Нийслэлийн Засаг дарга Х.Нямбаатарыг дээд шатныхаа даалгаврыг хангалтгүй биелүүлж, ард иргэдэд үнийн өсөлтийн дарамтыг мэдрүүлсэн үндэслэлээр чөлөөлж байгаагаа өчигдөр/2026.05.16/ мэдэгдлээ.

Улаанбаатар хотын хэмжээнд махны үнийг зохиомлоор үүсгэсэн гэж Улаанбаатар хотын захирагч Х.Нямбаатарыг буруутган дээрх шийдвэрийг гаргаж байгаа аж. Ерөнхий сайд өнөөдөр Хүчит шонхор захад ажиллахад нэг кг цул үхрийн мах 40 мянган төгрөгт хүрсэн байгаа аж.

Нийслэлчүүдийн махны хэрэгцээг хангахад зориулж өнгөрсөн жил нийслэлээс 8000 тонн нөөцийн мах бэлтгэж байсан бол өнөө жил 5000 тонныг бэлтгэсэн гэж байгаа ч 2400 тонн мах нийлүүлэгдээгүй. Нөөцийн махыг 600 цэгээр дамжуулан худалдаалж байгаа гэсэн ч цэгүүд дээр нөөцийн мах худалдаалаагүй.

Нийт есөн компани нөөцийн мах бэлтгэсэн ч хоёр компани нь нэг эзэнтэй зэрэг ноцтой асуудал хяналт шалгалтын шатанд илэрсэн байна. Иймээс Улаанбаатар хотын захирагч Х.Нямбаатарыг чөлөөлж байгаа аж.

Мөн Ерөнхий сайд Н.Учрал Тагнуул, Авлигатай тэмцэх газар, Цагдаагийн ерөнхий газар хамтарсан тусгай ажлын хэсэг байгуулж, нийслэлээс хэрэгжүүлж байгаа бүх төсөл, тендерийг шалгахыг үүрэг болголоо. Төсөл хэрэгжүүлэх нэрээр хулгай хийж байна гэж Ерөнхий сайд мэдэгдлээ.

Ц.МАГАЛЖАВЫГ ҮНДЭСНИЙ БӨХИЙН ХОЛБООНЫ ТЭРГҮҮНЭЭР УЛИРААН СОНГОЛОО

Монголын үндэсний бөхийн холбооны арав дахь удаагийн "Их Эе" хурал /2026.05.15/ боллоо. Тус хуралд дүрмийн дагуу 255 төлөөлөгч оролцохоос одоогоор 204 төлөөлөгч буюу 80 хувийн ирцтэй хуралдав.

Хурлаар:

МҮБХ-ны тэргүүний тайлан

Хяналтын зөвлөлийн тайлан

Допингийн эсрэг үндэсний төв болон Монголын Олон улсын ба Үндэсний спортын арбитрын мэдээлэл

МҮБХ-ны Дүрэм батлах

5. Бусад

5.1. МҮБХ-ны тэргүүлэгчдийн хурлаар хэлэлцэж шийдвэрлэсэн Аймгийн баяр наадамд амжилттай барилдсан бөхчүүдийн цол, эрэмбийг тусгасан асуудлаар мэдээллийг сонсож хэлэлцэх мөн улсын баяр наадамд 3 болон 4 давсан бөхчүүдийн эрэмбийг ямар журмаар тооцож байгааг тодруулах

5.2. МҮБХ-ны Тэргүүлэгчдийн ажиллах журмыг танилцуулж, хэлэлцүүлэх

5.3. Гадаад улсад байгуулагдаж буй салбар холбоодын мэдээлэл.

5.4. Баяр наадмын товыг тогтоосон асуудлаар Үндэсний их баяр наадмын тухай хуульд санал өгөх

6. Сонгууль:

6.1. МҮБХ-ны Тэргүүнийг сонгох /дүрэмтэй уялдуулна/

6.2. Тэргүүлэгч гишүүдийг сонгох /дүрэмтэй уялдуулна/

6.3. Барилдааны зөвлөлийн гишүүдийг сонгох /дүрэмтэй уялдуулна/

6.4. Хяналтын зөвлөлийн гишүүдийг сонгох. /дүрэмтэй уялдуулна/ зэрэг асуудлыг хэлэлцлээ.

Улмаар үндэсний бөхийн холбооны тэргүүнд Ц.Магалжав дахин өрсөлдөж, 100 хувийн саналаар улирав.

Энэ удаагийн "Их Эе" хуралд С.Мөнхбат, Ч.Санжаадамба, О.Хангай тэргүүтэй аваргууд ирж, өөрсдийн үзэл бодлыг илэрхийлж, саналаа хэлэв. Мөн МОНАДА буюу Монголын үндэсний допингийн эсрэг байгууллага, Монголын үндэсний ба олон улсын спортын арбитрын төлөөллүүд оролцож, бөхчүүдийн сонирхсон асуултад хариуллаа.

Энэ өдрийн гол үйл явдал нь хурал бус Н.Өсөхбаяртай холбоотой допингийн шийдвэр байсан гэхэд хилсдэхгүй. Бөхийн холбооны зүгээс ямартай ч спортын арбитрын шийдвэр учир дутагдалтай гэдгээ хэлсэн.

Д.БЯМБАСҮРЭН, В.АДЪЯА НАР 5-50 САЯ ТӨГРӨГИЙН ХАХУУЛЬ АВСАН НЬ ТОГТООГДЖЭЭ

Эрчим хүчний салбарын хоёр албан тушаалны хахуулийн хэргийг шүүхэд шилжүүлжээ. Прокурорын байгууллагаас тэднийг 5-50 сая төгрөгийн хахууль авсан болох нь урьдчилсан байдлаар тогтоогдсон учраас хэрэгт яллах дүгнэлт үйлдэж шүүхэд шилжүүлсэн байна. Тодруулбал, Д.Бямбасүрэн нь Эрчим хүчний үндэсний төвийн захирлаар буюу нийтийн албан тушаалтнаар ажиллаж байхдаа “Эс…” ХХК-д Баян-Өлгий аймгийн Цэнгэл сумын нутаг дэвсгэрт баригдах уурхайн барилга байгууламжийн цахилгаан хангамжийн техникийн нөхцөлд тавигдах шаардлагын тодорхой заалтуудыг техникийн нөхцөлөөс хасах, зохих журмын дагуу техникийн нөхцөлийг батлуулаагүй, эрх бүхий байгууллагын зөвшөөрөлгүй барьж буй цахилгаан дамжуулах агаарын шугам 1500 кВА дэд станцыг Эрчим хүчний үндэсний төвөөр ажлын зургийн магадлал, техникийн хяналт хийлгэж, улсын комисст хүлээлгэн өгөх давуу байдал бий болгохоор техникийн комиссын гишүүдэд нөлөөлж, 2022 оны 10 дугаар сарын 18-ний өдөр 5 сая төгрөгийн хахууль авсан, “Эс…” ХХК-ийн зөвлөх үйлчилгээ үзүүлсэн Ц.М нь дээрх ашиг сонирхлоо гүйцэтгүүлэх зорилгоор бусдад хахууль өгсөн хэрэгт Эрүүгийн хуулийн 22.4 дүгээр зүйлийн 4 дэх хэсэг /Нийтийн албан тушаалтан хахууль авах/, 22.5 дугаар зүйлийн 1 дэх хэсэг /хахууль өгөх/-т зааснаар яллах дүгнэлт үйлдэж, Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд шилжүүлжээ.

Харин В.Адъяа нь "Эрдэнэт, Булганы цахилгаан түгээх сүлжээ" ТӨХК-ийн гүйцэтгэх захирал буюу нийтийн албан тушаалтнаар ажиллаж байхдаа “Р…” ХХК-ийн гүйцэтгэх захирал Д.Г-ийн “Эрчим хүчний төсөл-2” хөтөлбөрийн хүрээнд … суманд баригдаж буй эрчим хүчний барилга байгууламжийг ашиглалтад оруулах, улсын комиссын дүгнэлт гаргуулах, санхүүжилт авах, ашиг сонирхлын үүднээс 50 сая төгрөгийн хахууль авсан хэрэгт Эрүүгийн хуулийн 22.4 дүгээр зүйлийн 1 дэх хэсэг /Нийтийн албан тушаалтан хахууль авах/-т зааснаар яллах дүгнэлт үйлдэж Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд шилжүүлсэн талаар мэдээллээ.

Б.ЧАГНААДОРЖ, Б.ЭНХСҮХ НАРЫГ ТОМИЛЛОО

“Эрдэнэс Тавантолгой” ХК-ийн Төлөөлөн удирдах зөвлөл /2026.05.13/ хуралдаж, компанийн Гүйцэтгэх захирлаар Б.Чагнаадоржийг томилсон.  Б.Чагнаадорж нь “Дархан төмөрлөгийн үйлдвэр" ТӨХК-ийн Гүйцэтгэх захирлаар ажиллаж, үйлдвэрт техник, технологийн шинэчлэл хийж, ордын олборлолтыг нэмэгдүүлэн, экспортыг эрчимжүүлж, ажилчдын нийгмийн асуудлыг шийдвэрлэж, төсвийн орлогыг нэмэгдүүлэхэд онцгой үүрэг гүйцэтгэсэн ажлын туршлагатай юм.

Түүнчлэн Засгийн газрын /2026.05.13/ ээлжит хуралдаанаар Гадаадын иргэн, харьяатын газрын дарга Н.Ууганбаярыг чөлөөлж, оронд нь Б.Энхсүхийг томилсон. Тэрбээр Монгол Улсаас Их Британи Умард Ирландын Нэгдсэн Хаант Улс /Англи/-д суугаа Онц бөгөөд Бүрэн эрхт Элчин сайдаар ажиллаж байсан билээ. Түүнчлэн Тагнуулын ерөнхий газарт ажилтан, ахлах ажилтан, тасаг, хэлтсийн дарга, ТЕГ-ын Тамгын газрын дарга, Монгол Улсаас БНХАУ-д суугаа Элчин сайдын яаманд зөвлөх, Консулын хэлтсийн дарга, ТЕГ-ын дэд даргаар тус тус ажиллаж байсан юм.